‘Masakra sapo ka nisur’: Historia e tmerrshme e bandave të Lushnjes – ORAinfo Ballina | ORAinfo.com - Nuk ndalet
Lajmet e fundit
7 °C

‘Masakra sapo ka nisur’: Historia e tmerrshme e bandave të Lushnjes

10:02 | 13 Tetor 2017

I ftuar në emisionin “Opinion”, gazetari Artan Hoxha ka komentuar atentatin ë në Lushnjë ku mbetën të vrarë dy persona dhe dy të tjerë u plagosën. Hoxha tha se masakra në Lushnjë sapo ka nisur, sipas tij asnjë nga personat e vrarë nuk ka qenë objektiv i atentatit. Edhe pse kanë kaluar 21 vite nga krijimi i “Bandës së Lushnjes”, përsëri hasmëritë në atë qytet vijojnë të jenë prezent. ABC News sjell të plotë të gjithë dinamikën e ekzekutimeve mes dy grupeve, ai i Aldo Bares dhe Artur Dajës.

Banda kriminale famëkeqe e qytetit të Lushnjes, e cila kishte si kryetar të saj Alfred Shkurtin, i njohur ndryshe si Aldo Bare, e kishte pikun e saj të gjatë viteve 1997 dhe 1998.

Gjatë pretencës së Prokurorisë së Krimeve të Rënda, kundërshtari kryesor i Aldo Bares ishte Artur Daja dhe konflikti kishte nisur nga vitit 1996.

Vrasjet janë të shumta, të realizuara nga “Banda e Lushnjes” si prerja e kokës e deri te ekzekutimi i kundërshtarëve me tritol dhe me breshëri automatiku.

Vetëm një vit më vonë, konkretisht në korrik ‘97 në qytetin e Lushnjes u vra Ramadan Shkurti, vëllai i të pandehurit Alfred Shkurti.

Aldo Bare, së bashku me viktimën dhe Enver e Bardhyl Rabija ishin nisur në drejtim të lokalit ku ndodhej Artur Daja.

Gjatë shkëmbimit të zjarrit ka mbetur i vdekur shtetasi Genci Kashari, i cili ishte në verandën e lokalit ku ndodhej edhe shënjestra Artur Daja.

Aldo Bare së bashku me shokun e tij Enver Rabija, u larguan nga vendi i ngjarjes.

Por të plagosur kishin mbetur në automjet Ramadan Shkurti dhe Bardhyl Rabija. Vetëm pak çaste më vonë Daja, edhe ky i plagosur, i afrohet kundërshtarëve të tij dhe qëllon nga afër vëllain e Aldo Bares dhe mikun e tij të ngushtë Bardhyl Rabija.

Në këto rrethana, pas vrasjes së vëllait të Aldo Bares, ky i fundit me qëllim hakmarrrjen ndaj Artur Dajës, krijoi të ashtuquajturën “Bandë e Lushnjes”.

Sipas organit të akuzës, anëtarë ishin Ilir Stergu, Afrim Hoxha, Arben Boriçi, Enver Boriçi dhe Enver Dondollaku.

Kalvari i vrasjeve vijoi. Objektivi ishte ekzekutimi dhe terrorizimi i të gjithë të familjarëve, të afërmve dhe miqve të Dajës. Kështu në 3 korrik të ‘97 në qytetin e Lushnjes u vra me armë zjarri shqiptaro-maqedonasi Xhevat Demiri, i cili ishte miku i Dajës.

Gjashtë muaj më vonë më 13 shkurt vritet Nimet Zeneli. Por historia e vrasjeve të përgjakshme, të cilët ishin kundërshtarë të Aldo Bares dhe miq të Artur Dajës vazhdon. Brenda muajit shkurt të ’98 vriten në rrugën Kolonjë–Bitaj të rrethit Lushnjë, Masar Aliu dhe personi që ishte rastësisht me të Idajet Beqiri.

Më 18 korrik të vitit ’98, në vendin e quajtur “Kodrat e ullinjve” u vra me breshëri automatiku Luan Bilbili, i cili konsiderohej si shok i ngushtë i Artur Dajës.

Por objektivin kryesor Aldo Bare do ta realizonte 3 muaj më vonë. Konkretisht më 21 tetor 1998 në fshatin Grabian të Lushnjes, pasi e kishin djegur trupin më herët, Artur Dajës i presin kokën, duke e ekspozuar në të gjithë qytetin e Lushnjes.

Gjithashtu emri i Aldo Bares lidhet edhe me akte të tjera kriminale të ndodhura gjatë viteve 2000-2005. Ai akuzohet për vendosjen e lëndës eksploziv me telekomandë në stadiumin e futbollit të qytetit të Lushnjës. Për vrasjen në vitin 2000 të inspektorit të Policisë Kriminale Klejdi Bano.

Gjithashtu Bare u akuzua në janar të vitit 2005 për ekzekutimin e Klodian Haxhiut, si edhe vrasjen e biznesmenit Baki Taullaut. Ndërkohë dyshohet edhe me vrasje të tjera që janë të pazbardhura si ekzekutimi i ish-kryetarit të SHIK-ut, të rrethit Lushnjë Bashkim Shkurti dhe për vrasjen e ish-nënkryetarit të Bashkisë së qytetit Lushnjë, Drago Voshtima, vrasje këto të kryera në vitin 1998.

Komento:

VËREJTJE: ORAinfo mban të drejtën e përzgjedhjes së komenteve që do të publikohen. Komentet që përmbajnë gjuhë të urrejtjes, përmbajnë sharje dhe lëndime, si dhe komentet që nuk ndërlidhen me artikullin në të cilin komentoni, nuk i publikojmë.

Ju faleminderit!