Isa Mustafa do t’i vazhdojë takimet me strukturat e partisë.

Të premten ai mblodhi të gjithë kryetarët e të gjitha degëve të partisë të cilës i prinë. E, nesër, e hënë, do ta takojë Grupin Parlamentar të LDK’së.

Njoftimin e ka bërë të ditur vetë partia.

“Nesër (e hënë), më datë 14 janar 2019, në orën 12:00, mbahet mbledhje me Grupin Parlamentar të LDK-së. Mbledhjen e kryeson kryetari i LDK-së, akademik Isa Mustafa dhe mbahet në Hotel Sirius”, thuhet në njoftimin e LDK-së.

LDK-ja nuk ka dhënë sqarime të tjera, se për çfarë është thirrur takimi mes kreut të partisë dhe deputetëve të saj në Kuvendin e Kosovës.

Të premten Mustafa dha sinjale se kjo parti përkrah secilën zgjidhje për Kosovën që përkrahet nga SHBA-ja, qoftë ajo edhe marrëveshje për “korrigjimin e kufijve”.

“S’mund të krekosemi që ne tash i kemi do parime më të mëdha se SHBA-ja sa i përket Kosovës”, ka thënë Isa Mustafa, i cili paraprakisht ka rikujtuar se SHBA-ja e ka bërë shtet Kosovën dhe se pa mbështetjen e saj sot vendi do të kishte më shumë se një milion refugjatë, shkroi Koha Ditore, në numrin e së shtunës. E zyrtarë të lartë amerikanë, prej kohësh, janë deklaruar të përkrahin secilën zgjidhje për të cilën autoritetet e Kosovës dhe ato të Serbisë merren vesh. Ndërkaq janë presidentët e të dyja vendeve që kanë shprehur gatishmërinë ta vënë në tavolinë “korrigjimin e kufijve”, nocion që shihet si eufemizëm për shkëmbim territoresh.

Komento:

	Komenti