Është shënuar shifër rekorde e të infektuarve me koronavirus.

Përderisa në botë është shënuar rekord i ri i rasteve të reja të të infektuarve me COVID-19, një ilaç lehtë i disponueshëm, që quhet deksametazon, ka treguar rezultate të mira sa i përket trajtimit të pacientëve me COVID-19 që janë në gjendje të rëndë.

Organizata Botërore e Shëndetësisë ka raportuar rekord të ri të lartë të shkallës së rasteve të reja të infektimit me COVID-19 në gjithë botën.
OBSH bëri të ditur që më 21 qershor janë raportuar më shumë se 183 mijë rastë të reja në mbarë botën gjatë 24 orëve.

Brazili dhe Shtetet e Bashkuara të Amerikës prijnë me numrat më të lartë të të infektuarve.

Drejtori i OBSH’së Tedros Adhanom Ghebryesus ka thënë se virusi ende është duke u përhapur me shpejtësi.

“Bota është në një fazë të re dhe të rrezikshme. Shumë njerëz janë ngopur duke qëndruar në shtëpi, vendet duan të hapin ekonomitë, por virusi ende është duke u përhapur me shpejtësi. Akoma është vdekjeprurës dhe shumica e njërëzve janë të ndjeshëm”, ka deklaruar ai.

Disa vende të cilat tejkaluan me sukses valën e parë të rasteve me COVID-19, tani janë duke luftuar ngritjen e lakores.

Trajtimi

Një steroid lehtë i disponueshëm dhe i lirë, deksametazoni, ka treguar se ka ndikim në përmirësimin e shëndetit për pacientët që janë në gjendje të rëndë nga COVID-19.

Por, OBSH’ja ka paralajmëruar se ky ilaç nuk mund të përdoret për të parandaluar infeksionin.

Deksametazoni është ilaçi i parë që është vërtetuar se përmirëson ndjeshëm gjendjen për rastet e rënda me COVID-19.

Zhvillimi i vaksinës

Tre kandidatë kinez janë të gatshëm të fillojnë provat klinike të fazës së tretë, pasi në dy fazat e para kanë zbuluar se injeksionet ishin të sigurta për njerëz.

Një prodhues i vaksinave ka thënë se provat në fazën e tretë do të zhvillohen jashtë Kinës, në një rajon ku numri i rasteve të infektuarve është i lartë, në mënyrë që të vlerësojnë më mirë se sa mund të mbrohen njerëzit nga virusi.

Studiuesit kinezë thanë që ata nuk kishin parë ndryshime domethënëse tek virusi, që do të vështirësonte zhvillimin e vaksinave.

Vlerësohet se rreth 150 kandidatë për vaksinë janë në testim në gjithë botën. Por, pritet që së paku 1 vit të kalojë deri sa të aprovohet vaksina dhe të shpërndahet në tërë botën.

Komento:

	Komenti