Sot, kryeministri i Kosovës, Albin Kurti ka njoftuar se me datën 15 mars Qeveria do ta heqë taksën 100 për qind për lëndën e parë që vjen nga Serbia.
Kryetari i Partisë Socialdemokrate, Dardan Molliqaj ka reaguar pas vendimit të kryeministrit të Kosovës, Albin Kurti për heqjen e taksës 100 për qind ndaj produkteve të Serbisë.
Molliqaj ka shkruar se: “Për të ardhur në pushtet, e zhveshi vetën dhe partinë. Për ta ruajtur pushtetin, po e zhveshë edhe Kosovën”, duke iu referuar vendimit të fundit të Kurtit.
Molliqaj gjithashtu ka thënë se luftën me Thaçin, Kurti e ka pasur luftë për të ardhur në vendin e Thaçit dhe tani ka përfunduar duke i shkuar prapa i zhytur në projektin e tij.
“Gjithçka qenka në pazar për Kurtin – ashtu siç ishte edhe për të tjerët para tij. E vetmja gjë e rëndësishme për të mbeti imazhi. Imazhi i një politikani gjoja ndryshe nga të tjerët. Prandaj krejt çka do të bëjë Kurti janë simbolikat që e ruajnë imazhin e tij, dhe kompromiset e dëmshme që ia ruajnë pushtetin.”, ka shkruar Molliqaj.
Ky është postimi i tij:
PËR TË ARDHUR NË PUSHTET, E ZHVESHI VETEN DHE PARTINË, PËR TA RUAJTUR PUSHTETIN, PO E ZHVESHË EDHE KOSOVËN
Për të ardhur në pushtet, Kurti dhe VV-ja e zhveshën vetën nga çdo parim e projekt politik. Hoqën dorë nga çdo kauzë mbi të cilën u ndërtuan e nga çdo premtim madhor që e kishin bërë. Por s’mjaftoi ardhja në pushtet. Tash Kurti don që ta mbajë pushtetin me çdo kusht. E për ta mbajtur pushtetin, ka filluar ta zhveshë Kosovën nga çfarëdo pozicioni i drejtë e i volitshëm negociues.
Kurti po e heq taksën ndaj Serbisë, jo sepse ka projekt të vetin përmes të cilit do ta zgjidhë problemin në mes Kosovës e Serbisë. Sepse nga projektet e tij tashmë është zhveshur. Kurti po e heqë taksën veç për shkak të presionit që po i bëhet karriges së tij të Kryeministrit.
Kurti po e heq taksën – kërkesë kjo që vjen nga Serbia – jo për të zbatuar një plan alternativ; jo për të vendosur reciprocitetin që e premtoi; as për të zhvilluar një dialog të ri, në baza të reja e me plan të ri. Kurti po e heq taksën sepse i është nënshtruar tërësisht projektit të vjetër negociues me Serbinë; sepse i është nënshtruar çfarëdo projekti që i ofrohet e që ia ruan pushtetin.
Sot po e shohim se si ai edhe luftën me Thaçin, nuk e kishte pasur kurrë si luftë kundër projektit të tij, por si luftë për të zënë vendin e tij – por që në fund përfundoi duke i shkuar prapa i zhytur tërësisht në projektin e Thaçit.
Gjithçka qenka në pazar për Kurtin – ashtu siç ishte edhe për të tjerët para tij. E vetmja gjë e rëndësishme për të mbeti imazhi. Imazhi i një politikani gjoja ndryshe nga të tjerët. Prandaj krejt çka do të bëjë Kurti janë simbolikat që e ruajnë imazhin e tij, dhe kompromiset e dëmshme që ia ruajnë pushtetin.
-4 °C
