Komunat anë e mbanë Kosvoës po vazhdojnë të përballet me luftën kundër koronavirusit.

Kryetari i Komunës së Gjilanit, Lutfi Haziri, ka apeluar qytetarët që të qëndrojnë në shtëpitë e tyre, ndërsa ka njoftuar për ndëshkimet e ashpra për të gjithë ata që i thyejnë rregullat e karantinës.

“Dënimet mandatore për përhapjen dhe mosrespektimin e sëmundjeve ngjitëse si masë parandaluese janë prej 600 deri 2 mijë euro për persona fizikë, ndërsa deri në 8 mijë euro për personat juridikë. Plus asaj, iniciohet procedurë penale nga ana e prokurorisë së shtetit. Dënimi me burg është deri në dy vjet për të gjithë personat që e përhapin virusin dhe nuk i zbatojnë masat”, ka thënë Haziri, në konferencën e ditës së 32-të.

Ai pohoi se nga dje, policia e shtetit po kontrollon hyrje-daljet në mënyrë rigoroze.

“Nuk ka hyrje e as dalje nga vendet e karantinës. Është vepër penale çdokush që pretendon të hyjë dhe të dalë nga zona e karantinës, sidomos nga Ferizaj, Vitia, Prishtina, Vrapçiqi dhe Topanica”, ka shtuar Haziri.

Në kuadër të Komitetit për menaxhimin e emergjencave, Gjilani po vazhdon zbatimin dhe shtrëngimin e masave kundër përhapjes së Covid-19.

“Komiteti ka vendosur sot masën e karantinës për shtatë familje në Lladovë, si pjesë e preventivës, meqë e kemi një rast të konfirmuar atje, i cili është në Klinikën Infektive. Rasti tjetër ndërlidhet me atë të Lladovës, meqë të dy punojnë në kampin ushtarak Bonsteel, derisa rasti i tretë është bashkëshortja e të infektuarit, në qytet. Fatmirësisht, kanë simptoma të lehta dhe pa probleme të mëdha shëndetësore. Urojmë të shërohen sa më shpejt”, ka deklaruar Haziri, në konferencën e së hënës.

Ndryshe, brenda 32 ditëve në Gjilan janë konfirmuar 21 raste me Covid-19, 14 janë shëruar plotësisht, ndërsa shtatë raste janë në trajtim dhe në mbikëqyrje të institucioneve shëndetësore.

Komento:

	Komenti