Katherine Brucker, e ngarkuara me punë e Misionit të Shteteve të Bashkuara në Organizatën për Siguri dhe Bashkëpunim në Europë, mision që përfaqëson qeverinë e SHBA-së në këtë organizatë, në një përgjigje të kthyer për udhëheqësen e OSBE-së në Kosovë, Cornelia Taylor, thotë se SHBA e mbështet një Kosovë demokratike dhe multietnike.
Në këtë përgjigje, ajo përmendi edhe dialogun Kosovë-Serbi, duke thënë se SHBA mbështet normalizimin e marrëdhënieve që përfundon me njohje reciproke mes të dyja vendeve, raporton Gazeta Express.
“Shtetet e Bashkuara e mbështesin Kosovën si një demokraci sovrane, multietnike dhe u kërkon liderëve të saj që të promovojnë një shoqëri që respekton të drejtat dhe gjithëpërfshirëse për të gjithë ata që jetojnë në Kosovë. Normalizimi i marrëdhënieve ndërmjet Kosovës dhe Serbisë përmes dialogut të lehtësuar nga BE-ja, siç është rënë dakord nga të dyja vendet, është thelbësor për stabilitetin dhe prosperitetin rajonal. Në fund të fundit, Shtetet e Bashkuara besojnë se normalizimi duhet të përfundojë me njohjen reciproke ndërmjet Kosovës dhe Serbisë, pasi të dyja kërkojnë të realizojnë aspiratat e tyre për në BE”.
Brucker gjithashtu shkruan se SHBA njeh përpjekjet e misionit dhe ekipit të përmirësuar marrëdhëniet ndëretnike në nivel lokal përmes dialogut, ndërsa adresoi edhe shqetësimet për kufizimet financiare për Misionin e OSBE-së në Kosovë.
“Fatkeqësisht, Misioni i OSBE-së në Kosovë – si të gjitha misionet e tjera në terren, Sekretariati dhe institucionet e pavarura – përballen me vështirësi të konsiderueshme operacionale për shkak të kufizimeve të rënda financiare. Paaftësia e shteteve pjesëmarrëse për të arritur konsensus mbi një buxhet të unifikuar ka vënë në presion të panevojshëm aftësitë e të gjitha misioneve në terren për të kryer me efektivitet mandatet e tyre, duke dëmtuar gjithçka, nga personeli dhe burimet deri te zbatimi i programit. Ne u bëjmë thirrje të gjitha shteteve pjesëmarrëse të miratojnë Buxhetin e Unifikuar sa më shpejt të jetë e mundur. Dhe thjesht dua të theksoj këtu se ne kemi një mundësi të artë në dy muajt e ardhshëm për të miratuar buxhetet e unifikuara 2024 dhe 2025, dhe duke e bërë këtë për ta vendosur OSBE-në në baza të shëndosha”.
Ajo ka falënderuar Taylor dhe ekipin e saj për përkushtimin për ta ndihmuar Kosovën të zbatojë reformat e nevojshme dhe të kontribuojë në stabilitetin rajonal.
“Ne mbesim të besimit se është për të ardhur keq që Kosova nuk është shtet pjesëmarrës i këtij organi dhe për këtë arsye nuk është në gjendje të flasë vetë para këtij organi. Mezi presim ditën kur kjo mund të ndodhë”.
4 °C
