AC Milan ka hyrë në fazën vendimtare të negociatave për mbrojtësin spanjoll Marc Pubill, dhe drejtuesit kuqezinj po bëjnë gjithçka për ta finalizuar marrëveshjen brenda kësaj jave. Sipas asaj që raporton MilanNews, rolin kyç në këto bisedime po e luan Igli Tare, i cili është në kontakt të vazhdueshëm me Almerian për të mbyllur transferimin sa më shpejt, përcjell ORAinfo.

Nevoja emergjente në mbrojtje

Mungesa e alternativave në repartin e krahëve ka shtyrë trajnerin Massimiliano Allegri të eksperimentojë me lojtarë si Tommaso Pobega dhe Alexis Saelemaekers si mbrojtës të krahut gjatë përgatitjeve para-sezonale – një zgjidhje e përkohshme që tregon se Milani ka urgjencë për përforcime.

Objektivi: Pubill të bashkohet me ekipin para turneut në Azi

Milani synon që marrëveshja me Almerian të mbyllet brenda fundjavës, në mënyrë që 21-vjeçari të jetë pjesë e skuadrës për turneun e planifikuar në Azi dhe Australi. Kjo do t’i jepte kohë të vlefshme për t’u integruar në sistemin e Allegrit.

Tare dhe Ramadani, çelësi i negociatave

Sipas burimeve të afërta me klubin, marrëdhënia e mirë e Igli Tares me Fali Ramadani – agjenti i Pubill – pritet të lehtësojë ndjeshëm mbylljen e këtij operacioni. Ndërkohë, interesimi i shtuar nga Wolverhampton Wanderers ka rritur presionin mbi Milanin për të vepruar me shpejtësi. /ORAinfo/

Komento:

	Komenti