SHBA dhe Rusia kanë diskutuar pushtimin izraelit të Bregut Perëndimor si një model të mundshëm për t’i dhënë fund luftës në Ukrainë, raporton The Times britanik.

Sipas këtij skenari, Rusia do të kishte kontroll ushtarak dhe ekonomik mbi pjesët e pushtuara Luhansk, Donetsk, Zaporizhzhia, Kherson, Krime përmes organit të saj qeverisës, duke imituar sundimin de facto të Izraelit mbi territorin palestinez të pushtuar nga Jordania në vitin 1967, transmeton KosovaPress.

Një burim pranë Këshillit të Sigurisë Kombëtare të SHBA-së pohon se ideja u përmend për herë të parë disa javë më parë gjatë bisedimeve midis Steve Witkoff, të dërguarit të paqes të presidentit të SHBA-së Donald Trump, dhe zyrtarëve rusë.

Witkoff, i cili gjithashtu ka një mandat për të ndërmjetësuar në Lindjen e Mesme, thuhet se e mbështet propozimin, dhe pala amerikane beson se kjo do të anashkalonte dispozitën e kushtetutës ukrainase që ndalon dorëzimin e territorit pa një referendum “gjithë-ukrainas”.

Presidenti ukrainas Volodymyr Zelensky e hedh poshtë vetë idenë e dorëzimit të vendit, por avokatët e modelit të pushtimit besojnë se kjo mund të jetë një mënyrë për të arritur një armëpushim pas tre vjet e gjysmë lufte.

Në atë rast, kufijtë e Ukrainës do të mbeteshin të njëjtë, ashtu siç kufijtë zyrtarë të Bregut Perëndimor nuk kanë ndryshuar për 58 vjet, edhe pse është nën kontrollin izraelit.

“Do të jetë e njëjtë me Izraelin që pushton Bregun Perëndimor – me një guvernator, me një ekonomi të lidhur me Rusinë, jo me Ukrainën. Por do të jetë ende Ukraina, sepse Ukraina nuk do të heqë dorë kurrë nga sovraniteti i saj. Por në realitet, do të jetë territor i pushtuar, dhe modeli është Palestina,” tha një burim pranë negociatave.

Pushtimi i Bregut Perëndimor është shpallur i paligjshëm nga Gjykata Ndërkombëtare e Drejtësisë, të cilin SHBA nuk e njeh, dhe Rusia e njeh pjesërisht. Në mars 2022, e njëjta gjykatë urdhëroi Rusinë të “ndërpresë menjëherë operacionet ushtarake” në Ukrainë, por vendimi nuk është zbatuar sepse gjykata nuk ka mekanizëm zbatimi.

Në shtator të vitit të kaluar, OKB-ja, me shumicë votash (124:14), miratoi një rezolutë që kërkonte që Izraeli të tërhiqte trupat e tij, të ndalonte ndërtimin e vendbanimeve të reja, të evakuonte kolonët dhe të hiqte pjesë të murit të sigurisë brenda Bregut Perëndimor të pushtuar. Izraeli dhe SHBA votuan kundër, ndërsa Mbretëria e Bashkuar abstenoi.

Disa negociatorë amerikanë besojnë se një rezultat i tillë për pjesët e pushtuara të Ukrainës thjesht pasqyron realitetin e luftës dhe mungesën e gatishmërisë së shteteve të tjera për t’u përfshirë ushtarakisht. Sipas tyre, e vetmja gjë që mbetet është të përcaktohen kufijtë e pushtimit rus, të cilin Putin po përpiqet ta zgjerojë sa më shumë që të jetë e mundur para samitit me Trump në Alaska.