Kryeministri në detyrë, Albin Kurti, ka përkujtuar 20-vjetorin e vdekjes së ish-Presidentit të Kosovës, Dr. Ibrahim Rugova, duke e cilësuar atë si figurë kyçe të shtetndërtimit, pluralizmit politik dhe ndërkombëtarizimit të çështjes së Kosovës.

Kurti ka theksuar se periudha e demokratizimit dhe e ndërkombëtarizimit të Kosovës është e lidhur ngushtë me emrin e Rugovës, i cili ishte kryetari i parë dhe më jetëgjatë i Lidhjes Demokratike të Kosovës (LDK), nga themelimi i saj më 23 dhjetor 1989 e deri në vdekjen e tij më 21 janar 2006.

Sipas Kurtit, Rugova udhëhoqi Kosovën në një periudhë tejet të vështirë, kur Serbia kishte vendosur regjim apartheidi dhe kishte mohuar ekzistencën e Republikës së Kosovës. Ai u zgjodh President i Kosovës më 24 maj 1992, duke udhëhequr një shtet juridikisht dhe politikisht unik, i cili në atë kohë njihej vetëm nga Republika e Shqipërisë.

“Konsistenca e tij në rezistencën paqësore dhe urtësia në mendim e veprim i hapën rrugë Kosovës në forume dhe tryeza ndërkombëtare, deri në takime me liderë botërorë, përfshirë edhe Presidentin e SHBA-së, Bill Clinton”, ka theksuar Kurti.

Ai ka vënë në pah rolin e Rugovës në orientimin perëndimor të Kosovës dhe në artikulimin e drejtë të çështjes së saj në arenën ndërkombëtare, duke shtuar se Rugova ishte Presidenti i parë i Kosovës si para ashtu edhe pas çlirimit.

Kurti ka kujtuar edhe jetën akademike të Ibrahim Rugovës, i lindur më 2 dhjetor 1944 në Cerrcë të Istogut, i cili ishte studiues i njohur i letërsisë dhe gjuhës shqipe, autor i dhjetëra studimeve dhe librave shkencorë, si dhe hulumtues në Institutin Albanologjik të Prishtinës.

“Në 20-vjetorin e ndarjes së tij nga jeta, kujtojmë me nderim Dr. Ibrahim Rugovën, Presidentin e Parë të Kosovës, intelektualin dhe udhëheqësin që ka zënë vend të veçantë në historinë politike dhe kulturore të vendit”, ka përfunduar Kurti.