Shtetet e Bashkuara dhe Irani do të mbajnë bisedime diplomatike të premten në Oman, mes tensioneve të shtuara dhe kërcënimeve të ndërsjella. Takimet do të fokusohen kryesisht në programin bërthamor iranian dhe mundësinë e lehtësimit të sanksioneve ndaj Teheranit.

Sipas burimeve diplomatike, bisedimet do të përqendrohen në tre çështje kryesore: pasurimin e uraniumit, kapacitetet e raketave balistike të Iranit dhe mbështetjen e grupeve të armatosura në rajon. Uashingtoni kërkon ndalimin e plotë të pasurimit të uraniumit brenda Iranit, ndërsa Teherani pranon vetëm kufizimin e tij, raporton “Al Jazeera”.

Administrata e presidentit Donald Trump ka paralajmëruar se është e gatshme për një marrëveshje, por ka lënë të hapur edhe opsionin ushtarak, duke rritur praninë e trupave amerikane në rajon. Nga ana tjetër, Irani këmbëngul se çdo marrëveshje duhet të përfshijë heqjen e sanksioneve, të cilat kanë goditur rëndë ekonominë e vendit.

Ndërmjetësues nga Katari, Turqia dhe Egjipti po përpiqen të afrojnë qëndrimet e palëve, ndërsa vendet e rajonit shpresojnë se bisedimet do të shmangin një përshkallëzim të mëtejshëm të konfliktit.