Proksi i Iranit me bazë në Liban, Hezbollahu, lëshoi rreth 30 raketa drejt Izraelit të mërkurën në mëngjes, tha ushtria izraelite, një ditë pasi Izraeli dhe Libani zhvilluan bisedimet e tyre të para të drejtpërdrejta pas dekadash në Washington, DC, raporton CNN.

Shumica e raketave u interceptuan dhe pjesa tjetër ranë në zona të hapura, thanë Forcat e Mbrojtjes së Izraelit (IDF).

Ndërkohë, të paktën 35 persona u vranë nga sulmet izraelite në Liban brenda një periudhe 24-orëshe, tha ministria e shëndetësisë e vendit në përditësimin e saj ditor të së martës.

Luftimet mes Izraelit dhe Hezbollahut kanë vazhduar pavarësisht një armëpushimi mes SHBA-së, Izraelit dhe Iranit, i cili hyri në fuqi javën e kaluar. Izraeli ka refuzuar të angazhohet për një armëpushim në Liban. Të dyja palët ranë dakord të zhvillojnë bisedime të tjera “në një kohë dhe vend të rënë dakord reciprokisht”.

Të martën, ministrat e jashtëm të Australisë, Mbretërisë së Bashkuar, Francës, Spanjës dhe 14 vendeve të tjera lëshuan një deklaratë të përbashkët për Libanin, duke u bërë thirrje “të gjitha palëve që urgjentisht të ulin tensionet dhe të shfrytëzojnë mundësinë e ofruar nga armëpushimi mes Shteteve të Bashkuara dhe Iranit”.