Zëvendëspresidenti amerikan, JD Vance, ka deklaruar se marrëveshja me Iranin tashmë po sjell përfitime konkrete për qytetarët amerikanë. Sipas tij, pas nënshkrimit të memorandumit të mirëkuptimit (MoU), rreth 12.5 milionë fuçi naftë kanë kaluar përmes Ngushticës së Hormuzit.

Vance tha se Irani nuk ka sulmuar asnjë anije që ka kaluar nëpër këtë Ngushticë, ndërsa SHBA-ja ka lejuar kalimin e rreth një duzine anijesh përmes bllokadës së saj detare.

Ai shtoi se programi bërthamor i Iranit dhe kapacitetet e tij ushtarake konvencionale mbeten të shkatërruara, ashtu si edhe aftësia e Teheranit për të kërcënuar vendet fqinje.

Vance tha gjithashtu se një pjesë e memorandumit është keqinterpretuar, duke iu referuar kryesisht fondit prej 300 miliardë dollarësh për rindërtim, në të cilin Irani mund të ketë qasje si pjesë e marrëveshjes.

Sipas tij, SHBA-ja nuk do t’i japë Iranit “asnjë cent”, ndërsa Irani do të përfitojë nga marrëveshja vetëm nëse e zbaton plotësisht atë dhe ndryshon sjelljen e tij.