Sekretari i Përgjithshëm i Kombeve të Bashkuara, Antonio Guterres, ka paralajmëruar se bota po përballet me dy kriza të ndërlidhura – krizën klimatike dhe atë energjetike – duke fajësuar varësinë nga karburantet fosile për përkeqësimin e tyre.

Në një fjalim gjatë Javës së Veprimit për Klimën në Londër, Guterres iu referua romanit të Charles Dickens “Një përrallë e dy qyteteve”, duke thënë se bota sot po përballet me “një rrëfim të dy krizave”.

“Krizat mund të duken të ndara, por ato kanë të njëjtën origjinë shkatërruese: karburantet fosile”, tha ai.

Duke iu referuar valës së të nxehtit që ka përfshirë kryeqytetin britanik, shefi i OKB-së deklaroi se “Londra nuk po thërret vetëm për veprim, por po zien”, duke bërë thirrje për përshpejtimin e tranzicionit drejt energjive të pastra dhe uljen e varësisë nga nafta, gazi dhe qymyri.