NATO po përshtatet me një peizazh të ndryshueshëm të sigurisë dhe Shtetet e Bashkuara nuk synojnë të largohen nga aleanca, tha ministri turk i Mbrojtjes, Yasar Guler, për Reuters, përpara samitit të NATO-s që do të mbahet javën e ardhshme në Ankara.

Turqia do t’i presë 32 liderë të NATO-s, si dhe zyrtarë nga rajoni i Gjirit dhe ai Azi-Paqësor, më 7-8 korrik, në një kohë tensionesh brenda aleancës lidhur me ndarjen e barrës, shpenzimet për mbrojtjen dhe ankesat e SHBA-së për mungesën e angazhimit të aleatëve në rihapjen e Ngushticës së Hormuzit.

Në përgjigjet me shkrim ndaj pyetjeve, Guler tha se samiti do të përqendrohet te uniteti i aleancës, vlerësimi i rritjes së shpenzimeve për mbrojtjen nga aleatët, forcimi i bashkëpunimit në industrinë e mbrojtjes dhe rritja e mbështetjes për Ukrainën. Ai shtoi se Ankaraja duhet të përfshihet në nismat europiane të mbrojtjes.

“NATO vazhdon të jetë një platformë e pazëvendësueshme dhe themelore për sigurinë dhe mbrojtjen euro-atlantike. Ne nuk e vlerësojmë periudhën që po kalojmë si një krizë, por si një proces përshtatjeje ndaj mjedisit të ndryshueshëm të sigurisë”, tha Guler.

Ai tha se SHBA-ja nuk ka synim të tërhiqet nga NATO, por dëshiron që aleatët europianë dhe Kanadaja të marrin më shumë përgjegjësi për sigurinë e Europës, e cila, sipas tij, duhet ta përfshijë edhe Ankaranë në planet dhe nismat e saj të mbrojtjes.