Federata sindikale e RTK-së ka njoftuar se kanë pezulluar protestën e paralajmëruar për sot në ora 11:30.

Kjo protestë është pezulluar pasi që të premtën, Qeveria në detyrë e Kosovës ka miratuar kërkesën për alokimin e ndarjeve buxhetore në vlerë prej 2,240,000 euro për Radio Televizionin e Kosovës.

Ata kanë thënë se ky vendim i hap rrugë tejkalimit të një situate të papranueshme, ku punëtorët e RTK-së kanë punuar 13 ditë pa paga, ndërkaq kanë thënë se do ta ndjekin situatën në vazhdimësi dhe nëse pagat nuk ekzekutohen, do ta nisin protestën e paralajmëruar për sot.

“Megjithatë, e bëjmë të qartë se kjo nuk nënkupton se çështja është mbyllur. Asnjë punëtor nuk duhet të detyrohet kurrë më të punojë pa marrë pagën e tij. Kërkojmë nga të gjitha institucionet përgjegjëse të marrin masa konkrete dhe të krijojnë mekanizma që garantojnë financim të qëndrueshëm të RTK-së dhe pagesën e rregullt të pagave. Punëtorët nuk do të pranojnë të jenë peng i bllokadave politike, neglizhencës institucionale apo dështimeve menaxheriale. Federata Sindikale e RTK-së dhe Sindikata e Punëtorëve të RTK-së do të vazhdojnë të mbrojnë pa kompromis të drejtat e çdo punëtori. Çdo tentativë që cenon dinjitetin, sigurinë ekonomike dhe të drejtat e punëtorëve do të përballet me reagim të menjëhershëm sindikal dhe me të gjitha mjetet demokratike që na garanton ligji. Falënderojmë të gjithë punëtorët për unitetin, solidaritetin dhe dinjitetin që treguan në këto ditë të vështira. Pikërisht ky unitet ishte forca që bëri të mundur tejkalimin e kësaj krize”, kanë thënë nga kjo Federatë.