Numri i viktimave nga shpërthimi i virusit Ebola në Republikën Demokratike të Kongos ka arritur në 930, ndërsa rastet e konfirmuara kanë shkuar në 2.344, sipas të dhënave më të fundit të publikuara nga Ministria e Shëndetësisë.

Autoritetet bëjnë të ditur se aktualisht 724 persona ndodhen në izolim ose po marrin trajtim spitalor, ndërsa 466 pacientë janë shëruar. Shkalla e vdekshmërisë nga virusi ka arritur në 39.7 për qind.

Ministria njoftoi gjithashtu se procesi i gjurmimit të kontakteve të personave të infektuar është realizuar në 85.8 për qind, në përpjekje për të frenuar përhapjen e epidemisë.

Shpërthimi i Ebolës, i shpallur më 15 maj, është përhapur në pesë provinca të vendit: Haut-Uele, Ituri, Kivu Verior, Kivu Jugor dhe Tshopo. Provinca Ituri vazhdon të mbetet zona më e prekur, ku varianti Bundibugyo i virusit po vazhdon të transmetohet në komunitet.

Qendrat Afrikane për Kontrollin dhe Parandalimin e Sëmundjeve (Africa CDC) njoftuan se autoritetet shëndetësore, ekipet në terren dhe partnerët ndërkombëtarë po bashkëpunojnë për të vënë nën kontroll shpërthimin dhe për të kufizuar përhapjen e mëtejshme të virusit.