Barazimi 1-1 i Milanit ndaj Juventusit të dielën ka nxjerrë në pah disa probleme që shqetësojnë drejtuesit dhe tifozët kuqezi sa i përket potencialit të skuadrës.
Në letër, një barazim në transfertë ndaj Juventusit nuk mund të konsiderohet rezultat katastrofik. Megjithatë, mënyra se si Milani u paraqit në Torino ka ngritur disa pikëpyetje serioze, veçanërisht për repartin ofensi. transmeton ORAinfo.
Një nga statistikat më shqetësuese ishte fakti se “Rossonerët” regjistruan vetëm një goditje në kuadrat, e cila ishte pikërisht goli i Alphadjo Cisse.
Juventusi arriti të shmangte humbjen vetëm në minutën e 92-të, kur Federico Gatti realizoi me kokë dhe i dha skuadrës së tij një pikë.
“Milani është ende një skuadër në ndërtim”
Sipas gazetarit Antonio Vitiello, i cili ka analizuar situatën në një editorial të publikuar nga MilanNews, Milani është ende larg të qenit një skuadër e kompletuar, pavarësisht investimit të madh prej rreth 150 milionë eurosh gjatë merkatos së verës.
“Barazimi ndaj Juventusit tregoi se ka ende shumë punë për t’u bërë. Milani është një skuadër në ndërtim dhe ky do të jetë gjithçka përveçse një sezon i lehtë”, shkruan Vitiello.
Sipas tij, paraqitja në Torino ishte zhgënjyese, ndërsa trajneri Ruben Amorim tregoi sinqeritet duke pranuar se skuadra e tij luajti dobët.
“Ne të gjithë prisnim diçka më shumë nga skuadra e Ruben Amorimit në Torino, por trajneri portugez, me shumë qartësi dhe ndershmëri intelektuale, pranoi se ekipi i tij luajti vërtet keq, pa kërkuar justifikime”, thekson Vitiello.
Megjithatë, pikërisht ky qëndrim i Amorimit shihet si një sinjal pozitiv. Trajneri duket i vetëdijshëm për problemet dhe kufizimet e skuadrës.
150 milionë euro investim, por ende boshllëqe
Një tjetër shqetësim lidhet me merkaton e verës. Pavarësisht shpenzimit të madh financiar, Milani duket se ka ende pozicione që kërkojnë përforcime.
Vitiello ngre një pyetje të drejtpërdrejtë: A mund të ishin shpenzuar më mirë 150 milionë eurot?
Sipas tij, përgjigjja është po.
Paraqitja ndaj Juventusit konfirmoi se skuadra ka ende boshllëqe që nuk u mbuluan gjatë merkatos. Edhe pse Amorim e kishte cilësuar merkaton si një “10/10”, realiteti në fushë duket më kompleks.
“Milani nuk duket gati për të luftuar për kreun e tabelës, pavarësisht investimit. Do të jetë një tjetër sezon i vështirë, me shpresën që skuadra të afrohet sa më shumë me objektivin e kualifikimit në Champions League”, përfundon analiza.
Në këtë fazë, Milani duket se është ende në kërkim të identitetit të tij. Rezultatet e para dhe paraqitja ndaj Juventusit tregojnë se Amorimit i duhet kohë, por në një klub me objektiva të larta si Milani, koha është një luks që trajneri nuk e ka në dispozicion me bollëk. /ORAinfo/
18 °C
