Komuna e Gjilanit që udhëhiqet nga Alban Hyseni ka finalizuar tenderin për blerjen e një automjeti për kryetarin e Komunës, me vlerë prej 24 mijë e 850 eurosh. Ajo që bie në sy në këtë procedurë është se në garë është pranuar vetëm një ofertë.

Sipas njoftimit për dhënie të kontratës, të publikuar në sistemin e prokurimit publik, Komuna e Gjilanit ka zhvilluar procedurë të hapur për “Furnizim me një automjet për Kryetarin e Komunës”. Vlera e parashikuar e kontratës ishte 25 mijë euro, shkruan ORAinfo.

Në dokumentin zyrtar të kontratës thuhet se më 23 shtator 2026 është bërë dhënia e kontratës, ndërsa numri i tenderëve të pranuar ishte vetëm një. Kontrata i është dhënë kompanisë DELTA TRADE RTC SH.P.K. nga Gjilani, në vlerë prej 24,850 eurosh.

Pra, nga 25 mijë eurot e parapara, komuna do të shpenzojë 24 mijë e 850 euro për automjetin e kryetarit – vetëm 150 euro më pak se vlera e parashikuar.

Vetëm një ofertë në një tender prej 25 mijë eurosh

Procedura është zhvilluar si procedurë e hapur, ndërsa kriteri i përcaktuar për dhënien e kontratës ishte çmimi më i ulët.

Megjithatë, dokumenti zyrtar tregon se në fund është pranuar vetëm një ofertë.

Madje, edhe çmimi i tenderit të përgjegjshëm me çmimin më të ulët dhe ai me çmimin më të lartë figurojnë të njëjtë: 24,850 euro.

Kjo do të thotë se në praktikë nuk ka pasur konkurrencë mes ofertuesve për çmimin, pasi oferta e kompanisë fituese ka qenë e vetmja e pranuar.

Tenderi ishte publikuar më 17 gusht 2026, ndërsa afati për dorëzimin e ofertave ishte 7 shtatori. Në sistemin zyrtar të e-Prokurimit figuron se procedura është zhvilluar si procedurë e hapur dhe me vlerë të parashikuar prej 25 mijë eurosh.

Vetura për kryetarin, në kohën e presionit mbi buxhetin publik

Çështja ngre edhe një pikë diskutimi për mënyrën se si përcaktohen prioritetet e shpenzimit të parasë publike.

Komuna ka vendosur që rreth 25 mijë euro nga buxheti publik t’i dedikohen një automjeti për kryetarin e Komunës, ndërsa kontrata është finalizuar me vetëm një ofertë të pranuar.

Fakti që ka vetëm një ofertë nuk dëshmon vetvetiu se procedura ka qenë e parregullt. Megjithatë, mungesa e konkurrencës e bën veçanërisht të rëndësishme që publiku të dijë pse vetëm një operator ekonomik ka paraqitur ofertë dhe nëse specifikimet e tenderit kanë krijuar kushte të mjaftueshme për konkurrencë. /ORAinfo/

Komento:

	Komenti