Vincenzo Montella po përballet me presion të madh në krye të Kombëtares së Turqisë, pasi tifozët vendas kërkuan largimin e tij gjatë humbjes së thellë 4-1 ndaj Italisë në Bursa.

Turqia pësoi tre gola në 27 minutat e para të takimit, ndërsa tifozët në stadium nisën të shprehnin pakënaqësinë ndaj trajnerit italian.

Pas golit të dytë të Italisë u dëgjuan thirrjet “Montella istifa”, që në shqip nënkupton “Montella, dorëhiqu”.

Situata u përshkallëzua edhe më tej pas pjesës së parë, në të cilën Italia realizoi tri herë përmes Alessandro Bastonit, Davide Frattesit dhe Michael Kayodes.

Baris Alper Yilmaz shënoi për Turqinë menjëherë pas pushimit, por Francesco Pio Esposito vulosi fitoren 4-1 të “Azzurrëve”.

Kjo ishte humbja e dytë e Turqisë në dy ndeshjet e para të Grupit A1 të Ligës së Kombeve.

Ekipi i Montellës kishte nisur edicionin me humbje 1-0 në shtëpi ndaj Francës, me Kylian Mbappen që shënoi golin e vetëm të takimit.

Presioni ndaj Montellës ishte rritur edhe më herët, pas paraqitjes zhgënjyese të Turqisë në Kupën e Botës 2026.

Turqit u eliminuan që në fazën e grupeve, pasi humbën 2-0 nga Australia dhe 1-0 nga Paraguai, përpara se ta mbyllnin turneun me fitoren 3-2 ndaj Shteteve të Bashkuara.

Me këto rezultate, Turqia përfundoi në vendin e katërt në Grupin D.

Montella, i cili është në krye të Turqisë që nga viti 2023, e udhëhoqi ekipin deri në çerekfinale të “Euro 2024”, ndërsa më pas Turqia u ngjit në Ligën A të Ligës së Kombeve pasi fitoi grupin në Ligën B.

Pas humbjes ndaj Italisë, Montella pranoi se nuk e kishte pritur reagimin kaq të ashpër të tifozëve.

Trajneri italian tha se lojtarët nuk e meritonin atë reagim, duke iu referuar rezultateve që, sipas tij, ekipi ka arritur gjatë viteve të fundit.

Me dy humbje në dy ndeshjet e para të Ligës së Kombeve dhe pas eliminimit të hershëm nga Botërori, presioni mbi Montellën tashmë është i madh.

Turqia do të rikthehet në fushë më 2 tetor, kur do të përballet me Belgjikën në udhëtim.

Komento:

	Komenti