Një video-projekt muzikor i reperit të njohur nga Kosova, Don Xhoni, është shndërruar në një skandal të madh politik dhe kulturor në Maqedoninë e Veriut.

Xhirimet e klipit të tij më të ri, “Sexy Mama”, të realizuara në ambientet e monumentit të njohur Makedonium, kanë shkaktuar një “tërmet” të vërtetë reagimesh, që çuan deri në dorëheqje dhe shkarkime zyrtare në shtetin fqinj.

Por, çka është në të vërtetë ky objekt dhe pse preku kaq shumë ndjeshmërinë e opinionit publik maqedonas?

Simboli i historisë dhe shtetësisë maqedonase

Makedoniumi (i njohur zyrtarisht si Monumenti i Ilindenit) nuk është thjesht një ndërtesë, por një nga simbolet më të rëndësishme kombëtare të Maqedonisë e Veriut. I përuruar në vitin 1974 në qytetin historik të Krushevës, ky monument u ndërtua për të nderuar Kryengritjen e Ilindenit të vitit 1903 dhe Luftën Nacionalçlirimtare, ngjarje këto që konsiderohen si themelet e shtetësisë së tyre.

Nga ana arkitekturore, objekti ka një dizajn unik futuristik që ngjan me një glob apo qelizë me dritare të dala në formë mbyllëse. Përveç vlerës monumentale, ai shërben edhe si vendprehje, pasi brenda tij ndodhet varri i Nikola Karevit, kryetarit të Republikës historike të Krushevës, si dhe busti i kryengritësit të famshëm, Pitu Guli.

Skandali që nisi nga një qira prej 500 eurosh

Skenat e klipit të Don Xhonit, ku shfaqen modele dhe vallëzime në një ambient kaq solemn, u konsideruan si “përdhosje” e trashëgimisë historike nga mediat dhe qytetarët maqedonas. Situata u ndez akoma më shumë kur u mor vesh se menaxhmenti i muzeut lokal e kishte lëshuar hapësirën me qira për vetëm 500 euro.

Reagimi institucional ishte i menjëhershëm:
• Dorëheqje e menjëhershme: Drejtori i Muzeut Historik të Krushevës, Miha Oxhaklieski, dha dorëheqjen duke kërkuar falje publike për atë që e quajti “lëshim të paqëllimshëm”.
• Shkarkime nga Kryeministri: Kryeministri maqedonas, Hristijan Mickoski, reagoi ashpër duke paralajmëruar shkarkimin e menjëhershëm të të gjithë Bordit Drejtues të institucionit që lejoi xhirimet.

Reagimi i Don Xhonit: “Ishte thjesht art”
Pas zhurmës së madhe që pushtoi mediat e rajonit, ka reaguar edhe vetë reperi kosovar. Përmes një sqarimi në rrjetet sociale, Don Xhoni ka theksuar se ekipi i tij nuk ka pasur asnjë qëllim provokimi apo tendencë politike.

Ai sqaroi se lokacioni u përzgjodh pastërtisht për vlerat e tij vizuale dhe arkitekturore, duke e konsideruar gjithçka si pjesë të një projekti artistik dhe pa asnjë qëllim keqdashës.

Komento:

	Komenti