Vendimi i presidentes Justina Shiroka-Pula për ta kthyer në Kuvend Ligjin për Dhomat e Specializuara ka hapur një kapitull të ri të debatit politik në Kosovë, vetëm pak javë pas protestave që u shoqëruan me përplasje mes demonstruesve dhe Policisë.
Ligji, i miratuar më 6 tetor me 88 vota, është rikthyer për rishqyrtim pas kërkesës së Partisë Demokratike të Kosovës (PDK), e cila kishte iniciuar ndryshimet ligjore.
Ky zhvillim ka nxitur reagime edhe brenda vetë PDK-së. Ish-deputeti Bekim Haxhiu ka kërkuar dorëheqjen e të gjithë kryesisë së partisë, duke kërkuar që kjo të ndodhë deri në mesnatë.
A mund të rikthehen protestat?
Kthimi i ligjit vjen pas një periudhe protestash në Prishtinë, të organizuara nga iniciativa “Jo në emrin tim”, në kundërshtim të dënimeve të shqiptuara ndaj ish-krerëve të UÇK-së në Hagë.
Më 5 tetor, gjatë protestave në kryeqytet, pati përplasje mes protestuesve dhe Policisë, ndërsa u përdorën edhe gaz lotsjellës dhe topa uji.
Sipas Policisë, gjashtë zyrtarë policorë u lënduan, 11 qytetarë kërkuan ndihmë mjekësore dhe tre protestues u shoqëruan në stacion policor.
Protestat përfunduan më 6 tetor, pas arritjes së marrëveshjes politike për miratimin e ndryshimeve në Ligjin për Specialen.
Tani, pas vendimit të presidentes, shtrohet pyetja nëse pakënaqësitë do të shprehen sërish përmes protestave apo nëse debati do të vazhdojë brenda institucioneve.
Deri më tani, nuk ka një paralajmërim të konfirmuar për organizimin e protestave të reja si pasojë e vendimit të 22 tetorit.
Fjala e radhës i takon Kuvendit
Sipas Kushtetutës, Kuvendi mund ta miratojë sërish ligjin me të paktën 61 vota.
Megjithatë, mbetet të shihet se si do të trajtohen dispozitat e kontestuara dhe nëse subjektet politike do të arrijnë pajtueshmëri për ndryshimet.
Ndërsa procedurat parlamentare pritet të vazhdojnë, vëmendja mbetet edhe te reagimet e organizatave dhe qytetarëve që kanë protestuar më herët për çështjen e Gjykatës Speciale.
Për momentin, rikthimi i protestave mbetet një pyetje e hapur, jo një zhvillim i konfirmuar.
11 °C
