A duhet t’i bashkohet Kosova Mini-Schengenit Ballkanik? Flet ish-ambasadori – Ora Info Ballina | ORAinfo.com - Nuk ndalet

A duhet t’i bashkohet Kosova Mini-Schengenit Ballkanik? Flet ish-ambasadori

20:07 | 24 Dhjetor 2019

Ish-ambasadori i Shqipërisë në Hungari, Lisen Bashkurti, ka thënë se Kosova ka të drejtë që s’i bashkohet Minit-Schengenin Ballkanik.

Në një bisedë për top-channel, Bashkurti tha se problemi kryesor i kësaj iniciative është mos-pjesëmarrja e Kosovës në të.

“Jo të gjithë vendet e Ballkanit e kanë përqafuar këtë iniciativë, Kosova për shembull që është problemi kryesor por edhe shqetësimi më i madh i kësaj polemike që është krijuar në mjediset dhe hapësirat shqiptare, është pikërisht zelli i madh i Tiranës për t’ju ofruar kësaj nisme dhe për ta lançuar atë”, ka thënë Bashkurti.

Ai thotë se Kosova ka të drejtë që nuk i bashkohet kësaj nisme. “Kosova ka disa paqartësi shumë të mëdha dhe janë të arsyeshme për faktin se Kosova nuk mund t’i bashkohet një hapësire me liberalizim të plotë me lëvizje të njerëzve, shërbim dhe kapitaleve për sa kohë kjo nismë synon me heq kufijtë e brendshëm. Thelbi i kësaj nisme është të heq kufijtë e brendshëm dhe ngelen vetëm kufijtë e jashtëm të Ballkanit perëndimor. Kosova është përballë problemit të njohjes së kufijve, nuk mund të heqë atë që nuk është njohur ende. Jo vetëm kaq por Kosova ka probleme me kufirin lindor lidhur me Serbinë. Serbia ka qasje krejt kontroverse me pretendimet territoriale. Ne i dimë iniciativat që u lançuan sidomos dy vitet e fundit për shkëmbime territoriale”, tha Bashkurti.

Ai thotë se logjikisht, një nismë e tillë do t’i krijonte disa sfida serioze Kosovës.

“Së pari do ta bënte nul çështjen e kufirit të Kosovës. Së dyti, Kosova ka aspekte tjera të marrëdhënieve me Serbinë që i ka të pastabilizuara dhe nuk mund të avancojë më tutje nëse nuk shkon hap-pas-hapi, që është procesi i njohjes reciproke midis shteteve. Tirana nuk është sjellë në mënyrë të pjekur. Tirana është dashur ta konsultojë deri në detaje nismën me Kosovën sepse aty është ‘thembra e Akilit’, aty është pjesa më e vështirë në bashkëpunimin rajonal”, u shpreh ai.

Sipas tij, nga kjo nismë do të humbin edhe Kosova edhe Shqipëria, “dhe do të humbë edhe vetë nisma, sepse një nismë e tillë pa Kosovën nuk ka shans për sukses”.

Ndërkaq, ai foli edhe për formimin e Qeverisë së Kosovë, duke thënë se “në qoftë se palët nuk arrijnë marrëveshje për bashkëqeverisje, të dy palët injorojnë vullnetin e popullit dhe qytetarëve të Kosovës”.

“Vullneti i qytetarëve ka qenë i tillë që ka votuar dy forcat kryesore për bashkëqeverisje”, deklaroi Bashkurti.

Lisen Bashkurti ka qenë ambasador i Republikës së Shqipërisë në Hungari, pranë Këshillit të Evropës në Bruksel dhe më pas përfaqësues i Shqipërisë në OKB. Ka qenë drejtor i Analizë-Prognozës në Ministrinë e Punëve të Jashtme. Ka hulumtuar në fushën e Marrëdhënieve Ndërkombëtare dhe ka shkruar “Historinë e Diplomacisë” në dy vëllime. Aktualisht është President i Akademisë Diplomatike Shqiptare.

Komento: