Kreu i Komunës së Mitrovicës, Agim Bahtiri ua ka dorëzuar presidentit të vendit Hashim Thaçit dhe kryeparlamentarit Kadri Veselit peticionin për bashkimin e Mitrovicës.
Bahtiri, ka marrë rrugën drejt institucioneve të vendit që të dorëzojë peticionin me 16,594 nënshkrime të qytetarëve për bashkimin e Mitrovicës, raporton Express.
Peticionin për bashkimin e Mitrovicës, Bahtiri ka thënë se së pari do t’ua dorëzojë presidentit të Kosovës, Hashim Thaçi e kryeparlamentarit Kadri Veseli, derisa më pas të njëjtin do ta dorëzojë edhe te kreu i Qeverisë, Ramush Haradinaj.
Bahtiri po kërkon nga institucionet përkatëse që të miratojnë këtë nismë të ndërmarrë nga vetë qytetarët e Mitrovicës.
Ndryshe, iniciativa për nënshkrimin e këtij peticioni ka ardhur pasi Ministria e Administrimit të Pushtetit Lokal ka refuzuar kërkesën e kryetarit të Mitrovicës, Agim Bahtiri, dhe vendimin e Kuvendit të Mitrovicës për ndryshimin e Ligjit për Kufijtë Administrativë të Komunave, me qëllim bashkimin e qytetit të Mitrovicës.
I pari që kishte nënshkruar peticionin ishte Agim Bahtiri e pas tij edhe zyrtarët tjerë komunalë. I pari i Mitrovicës kishte thënë se bashkimi i qytetit nuk cenon në asnjë mënyrë integritetin territorial të Republikës së Kosovës.
7 °C
