Shpend Ahmeti reagon menjëherë pasi në Prishtinë do të vendoset ora policore.
Kryetari i Komunës së Prishtinës ka kundërshtuar masat e reja anti-Covid të marra nga Qeveria e Kosovës.
Ahmeti ka shkruar në Facebook se Prishtina ka më shumë persona pozitivë me COVID-19, sepse në kryeqytet po bëhen më shumë teste.
“Sistemi i qeverisë për masa: Prishtina në zonën e kuqe, e Lypjani e Gracanica zonë e gjelbërt thua se jemi qindra kilometra larg. Në qoftë se një komunë nuk e teston askënd, pra nuk ka raste pozitive atëherë është në zonën e gjelbër. Prishtina me 12000 teste natyrisht se ka me dal me numër më të madh se sa Ferizaji me 350 teste”, ka shkruar i pari i Prishtinës.
Ahmeti thotë se është kundër mbylljes pa ndihmë ekonomike për bizneset dhe qytetarët.
“Jo mbylljes me këso parimesh e kriteresh! Jo mbylljes pa ndihme ekonomike për bizneset dhe qytetarët”, ka shkruar Ahmeti.
Ndërkohë, në bazë të masave të reja që u prezantuan sot nga Kryeministri i Kosovës, Avdullah Hoti, Prishtina dhe gjashtë komuna tjera do të kenë masa strikte.
Në komunat me rrezik të lartë, apo në zonë të kuqe Hoti ka bërë të ditur se do të ndalohen aktivitetet ekonomike pas orës 19:00.
“Në zonë të kuqe janë shtatë komuna, Prishtina, Podujeva, Gjakova, Gjilani, Ferizaj, Fushë Kosova, Obiliqi dhe Shtimja. I kemi marrë dy veprime, e lejojmë aktivitetin ekonomik të zhvillohet deri në orën 19:00 me specifikat e manualit për mbrojtje nga koronavirusi. Nga ora 19:00 mbyllet çdo aktivitet ekonomik vendoset kufizim i plotë i qytetarëve, orë policore nga ora 19 në këto komuna. Ndalohen hyrje-daljet në këto komuna nga ora 19:00”, ka deklaruar Hoti.
Hoti tha se masat do të hyjnë në fuqi nga kjo e premte.
“Kjo është zgjidhja më e mirë që kemi mundur të bëjmë, duke pasur parasysh interesat që ka ekonomia, por duke vendosur në rend të parë shëndetin publik. Masat do t’i dërgojmë për votim menjëherë pas kësaj konference. Masat hyjnë në fuqi të premten në orën 19:00, kur fillon mbyllja e komunave në zonë të kuqe. Gjatë ditës kemi lejuar aktivitetin ekonomik me masa strikte”, ka deklaruar Hoti.
22 °C
