Në kuadër të vizitës në Oqeani, zëvendësministri i Punëve të Jashtme dhe Diasporës, Kreshnik Ahmeti, filloi vizitën në Fixhi ku u prit në takim nga kryeministri i Fixhit, Sitiveni Rabuka.
Ahmeti dhe Rabuka vlerësuan lartë marrëdhëniet midis dy vendeve. Diskutimi u përqendrua rreth marrëdhënieve dypalëshe, bashkëpunimi në rrafshin ndërkombëtar dhe zhvillimet e fundit botërore.
Gjatë takimit, u diskutua për thellimin e marrëdhënieve dypalëshe, me theks të veçantë për marrëveshjen në proces lidhur me konsultimet politike.
Lidhur me bashkëpunimin ndërkombëtar, Ahmeti, falenderoi Rabukna, për mbështetjen e vazhdueshme që ka dhënë Fixhi përgjatë proceseve integruese të Kosovës në organizata ndërkombëtare.
Ndërsa, sa i përket zhvillimeve të fundit botërore, u tha se është e rëndësishme që të ruhet paqja dhe stabiliteti. Të dyja palët vlerësuan se ndajnë të njëjtat vlera në këtë drejtim.
Në fund, Ahmeti, falenderoi Rabukan për mbështetjen dhe pritjen e bërë nga Republika e Fixhit.