Aleanca Kosovare e Bizneseve,  ka reaguar ndaj listave të reja të kandidatëve për deputetë, të publikuara nga partitë politike për zgjedhjet e 9 shkurtit 2025. Me 110 kandidatë, këto lista nuk duket të ofrojnë ndonjë motivim të mjaftueshëm për një pjesëmarrje masive në zgjedhje, thonë nga AKB-ja.

Sipas AKB-së, partitë politike kanë dështuar të rekrutojnë figura të reja, tërheqëse dhe konkurruese që do të mund të tërhiqnin interesin e votuesve, veçanërisht të rinjve. Mungesa e ideve të reja dhe e një vizioni të qartë për përmirësimin e kushteve të jetesës ka bërë që këto lista të duken si një ripërtëritje e emrave të vjetër, duke përforcuar perceptimin e një “rinovimi” të sipërfaqshëm.

Për më tepër, shumë prej kandidatëve të rinj janë të lidhur me figurat e vjetra politike, duke mos sjellë një frymë të re në skenën politike. Kjo situatë ka krijuar një mungesë të dukshme të ndryshimeve domethënëse, duke e bërë të vështirë krijimin e një ndryshimi të qëndrueshëm dhe të vlerësuar nga qytetarët.

Në një moment kur partitë e reja janë të pakta dhe ato ekzistuese nuk kanë sjellë ndryshime të dukshme, AKB vëren se përfaqësimi i sektorit privat në këto lista është minimal. Pavarësisht ndikimit të madh të biznesit në ekonominë e vendit, figura të suksesshme nga sektori privat mungojnë, duke i mohuar mundësinë Kosovës për të përfituar nga ide dhe zgjidhje inovative që mund të orientonin fushatën dhe, ndoshta, edhe për të ndikuar në zgjedhjen e fituesit.

Shahini shtoi se kjo ofertë e varfër politike tregon se klasa e vjetër politike nuk ka interes të krijojë konkurrencë për vetveten, dhe listat e reja me emra të njohur konfirmojnë mungesën e vullnetit për ndryshime të vërteta.

Në një situatë ku Kosova po përballet me një emigracion masiv dhe një elektorat të lodhur nga premtimet bosh, AKB parashikon një pjesëmarrje të ulët në zgjedhje, duke bërë të vështirë krijimin e ndryshimeve reale që qytetarët dhe bizneset presin. Sipas AKB-së, pa figura të reja dhe pa ide të qarta për një të ardhme më të mirë, procesi zgjedhor mund të kthehet në një formalitet që nuk do të prodhojë ndryshime të prekshme për jetën e qytetarëve dhe zhvillimin e bizneseve.

Postimi i AKB-se:

Lista e re, oferta e vjetër

Partitë politike kanë publikuar listat e tyre me 110 kandidatë për deputetë në Parlamentin e Kosovës për zgjedhjet e 9 shkurtit 2025. Megjithatë, kjo ofertë nuk duket të jetë mjaftueshëm motivuese për të nxitur pjesëmarrjen masive të votuesve.

Partitë nuk kanë arritur të rekrutojnë figura të reja, tërheqëse, të besueshme dhe konkurruese, të cilat do të kishin potencialin për të tërhequr interesimin e votuesve, sidomos të rinjve. Mungesa e kandidatëve me ide të reja dhe vizion të qartë për përmirësimin e standardit jetësor ka bërë që listat të duken si një ripërtëritje e emrave të vjetër. Për më tepër, edhe disa prej emrave të rinj të paraqitur janë familjarë ose të lidhur me figurat e vjetra politike, duke forcuar perceptimin e një “rinovimi” të sipërfaqshëm.

Shumë prej kandidatëve janë figura të njohura që kanë qenë pjesë e skenës politike për vite me radhë, por që nuk sjellin një frymë të re në ofertën politike. Në një situatë ku partitë e reja pothuajse mungojnë dhe partitë e vjetra janë provuar nga votuesit pa ndonjë ndryshim domethënës, pritshmëritë për ndryshim mbeten të ulëta.

Pavarësisht ndikimit të madh që bizneset kanë në ekonominë e vendit, përfaqësimi i tyre në listat zgjedhore është minimal. Përfshirja e figurave të suksesshme nga sektori privat, që mund të ofronin ide dhe zgjidhje inovative, mungon. Në një kohë kur politika shpesh drejtohet nga interesat ekonomike, një përfaqësim më i madh i biznesit mund të kishte ndikuar pozitivisht në orientimin e fushatës dhe, ndoshta, edhe në zgjedhjen e fituesit.
Me këtë ofertë të varfër politike, duket se klasa e vjetër politike nuk ka dashur të krijojë konkurrencë për vetveten. Lista të reja me emrat e vjetër konfirmojnë mungesën e vullnetit për të ndikuar ndryshimet e duhura. Kjo tregon qartë se partitë nuk janë të gatshme të hapin rrugën për një frymë të re konkurrues.

Mungesa e motivimit për zgjedhje

Në kushtet aktuale, ku Kosova përballet me një emigracion masiv dhe me një elektorat të lodhur nga premtimet boshe, nuk pritet një motivim i madh për të dalë në zgjedhje. Kjo situatë mund të rezultojë në një pjesëmarrje të ulët, duke e bërë të vështirë krijimin e një ndryshimi të qëndrueshëm dhe të mirëpritur nga qytetarët.

Në fund, pa figura të reja dhe pa ide të qarta për një të ardhme më të mirë, partitë politike rrezikojnë ta kthejnë procesin zgjedhor në një formalitet që nuk do të prodhojë ndryshime reale për jetën e qytetarëve dhe bizneseve tha Agim Shahini Kryetar i AKB-ës.

Komento:

	Komenti