Trajneri i Milanit, Ruben Amorim, ishte i drejtpërdrejtë pas barazimit 1-1 ndaj Juventusit, duke pranuar se skuadra e tij nuk e meritonte fitoren në Torino.

Milani ishte shumë pranë një tjetër fitoreje në fillimin e epokës së Ruben Amorimit, por Juventus e barazoi rezultatin në minutat shtesë dhe i hoqi kuqezinjve fitoren nga duart, transmeton ORAinfo.

Milani kaloi në avantazh në pjesën e dytë me anë të zëvendësuesit Alphadjo Cisse. Sulmuesi përfitoi nga një pasim i Samuel Chukwuezes dhe realizoi me të djathtën nga brenda zonës.

Megjithatë, në minutën e dytë të kohës shtesë, Federico Gatti u la i lirë në zonë dhe me kokë dërgoi topin në rrjetë, duke vendosur shifrat përfundimtare 1-1.

Pas ndeshjes, Amorim nuk kërkoi justifikime dhe pranoi se Milani duhet të kishte bërë më shumë.

“Nuk e meritonim të fitonim. Nëse jemi të sinqertë, nuk mendoj se Juventusi e meritonte të humbiste”, deklaroi Amorim.

Tekniku portugez pranoi se skuadra e tij pati probleme me qarkullimin e topit dhe humbi shumë topa në momente të rëndësishme.

“Nuk mendoj se luajtëm mirë, por kemi vetëm dy muaj që po punojmë së bashku. Morëm një pikë. Sigurisht që duhet të bëjmë më mirë, por na duhet kohë. Ishte një ndeshje e vështirë.”

Amorim: Duhet të përmirësojmë gjërat bazë

Trajneri i Milanit theksoi se problemi nuk qëndron te mungesa e cilësisë individuale, por te elementët bazë të lojës.

“Kemi cilësi individuale, por sot na munguan gjërat e thjeshta. Në futboll, gjërat e thjeshta janë më të mirat. Edhe mënyra se si e marrim dhe e pasojmë topin duhet të jetë perfekte. Sot nuk ishim të mirë në bazat e lojës.”

Amorim gjithashtu pranoi se Milani pati vështirësi sidomos pas humbjes së topit, duke u ekspozuar në tranzicionet e Juventusit.

“Kur humbnim topin, ishim shumë të ekspozuar në tranzicion. Është diçka që duhet ta përmirësojmë, por nuk do ta ndryshojmë mënyrën tonë të lojës.”

Fjalë të mira për Cissen, por Amorim kërkon më shumë

Sa i përket autorit të golit të Milanit, Alphadjo Cisse, Amorim u shpreh i kënaqur, por paralajmëroi se nuk duhet të ketë nxitim me të rinjtë.

“Jam shumë i lumtur për të gjithë lojtarët, por duhet të jemi të kujdesshëm me lojtarët e rinj. Në futbollin e sotëm ekziston tendenca për t’i promovuar shumë shpejt.”

Trajneri shtoi se Cisse duhet të vazhdojë të punojë fort në stërvitje, pavarësisht golit të rëndësishëm ndaj Juventusit.

“Jam shumë i lumtur për të, sepse të gjithë duan të shohin një lojtar të ri të bëjë mirë, veçanërisht një italian. Është një moment i madh për të, por mendoj se Cisse mund të bëjë shumë më mirë.”

Në fund, Amorim theksoi se edhe pse Milani nuk zhvilloi një ndeshje perfekte, ai nuk dëshiron të jetë tepër kritik ndaj skuadrës.

“Duhet të luftojmë deri në fund në çdo ndeshje. Sot mund të kishim fituar, por përsëris: Juventusi nuk e meritonte të humbiste.” /ORAinfo/

Komento:

	Komenti