Trajneri i Milanit, Ruben Amorim, nuk i ka kursyer kritikat ndaj skuadrës së tij pas humbjes 2-0 ndaj Ferencvaroshit në Ligën e Evropës.

Kuqezinjtë kishin nevojë për fitore, pasi kishin humbur dy nga tri ndeshjet e para në këtë garë, por në vend të reagimit, zhvilluan një nga paraqitjet më të dobëta që nga ardhja e Amorimit në krye të ekipit.

Dy golat e Lenny Joseph në pjesën e dytë i siguruan Ferencvaroshit tri pikët e merituara, ndërsa Milani u largua nga fusha me shumë zhgënjim.

Për këtë takim, Amorim kishte vendosur të bënte gjashtë ndryshime në formacion krahasuar me ndeshjen e fituar ndaj Interit. Megjithatë, as inkuadrimi i Christian Pulisic, Diego Moreira, Mario Gila dhe Luka Modric në pjesën e dytë nuk arriti ta ndryshonte rrjedhën e lojës, transmeton ORAinfo.

Amorim: Nuk ishim të përgatitur për të luajtur futboll

Duke folur për Sky pas ndeshjes, tekniku portugez ishte i ashpër në vlerësimin e paraqitjes së skuadrës.

“Për këtë ndeshje nuk ka shpjegim. Nuk kam çfarë të them, sidomos për pjesën e parë. Nuk më kujtohet një pjesë e parë tjetër si kjo. Gjithçka ka të bëjë me ambicien, përqendrimin dhe dëshirën. I dhuruam kundërshtarit raste dhe bëmë gabime të panevojshme. Nuk ishim të përgatitur për të luajtur futboll sonte”, deklaroi Amorim.

I pyetur se si mund të shpjegohej një paraqitje e tillë, ai shtoi:

“Është e vështirë të shpjegohet. Thjesht nuk ishim gati për të kaluar nga derbi në një kompeticion tjetër. Kur luan për Milanin, ke përgjegjësi dhe nuk mund të paraqitesh kështu. Ndoshta edhe unë nuk arrita ta përgatisja skuadrën siç duhej”.

“Nuk jemi gati të garojmë në dy fronte”

Amorim u pajtua se skuadra duhet të punojë edhe në aspektin e mentalitetit dhe qasjes ndaj ndeshjeve.

“Nuk jemi gati të jemi konkurrues në dy fronte. Duhet të punojmë në mënyrën se si e shohim futbollin dhe si i qasemi ndeshjeve. Sonte nuk ka justifikime dhe nuk kam asgjë për të thënë në mbrojtje të ekipit”.

“Zakonisht kam shumë gjëra për të thënë në mbrojtje të skuadrës, por jo sonte. Duhet të jemi më modestë dhe të kuptojmë se çfarë ndodhi”.

Trajneri pranoi gjithashtu se duhet gjetur një zgjidhje për problemet që po përsëriten.

“Duhet ta rregullojmë këtë situatë. Nuk mund të supozojmë se gjërat do të vazhdojnë kështu. Duhej të bënim shumë gjëra më mirë. Edhe të ishim më të mirë në topat e dytë do të kishte bërë ndryshim të madh. Sonte nuk ishim fare në lojë”.

Pavlovic, shembulli që duhet ndjekur

Në fund, Amorim veçoi mbrojtësin Strahinja Pavlovic, duke e marrë si shembull përkushtimin e tij në stërvitje.

“Secili duhet të stërvitet si Pavlovic. Ai është gati të japë gjithçka në stërvitje. Është një shembull i mirë. Ndonjëherë lojtarët që nuk e nisin ndeshjen nga minuta e parë kanë vështirësi, por nuk ka justifikime. Duhej të fitonim edhe me lojtarët që startuan”.

Milani nuk dorëzohet në Ligën e Evropës

Pavarësisht situatës së komplikuar në garën evropiane, Amorim bëri të qartë se Milani nuk do të heqë dorë nga objektivat në Ligën e Evropës.

“Natyrisht që duhet të fokusohem te kampionati, por duhet të bëjmë mirë edhe në Ligën e Evropës. Duhet dhe mund të fitojmë ndeshje edhe me rotacion. Duhet të jemi gati të luajmë dhe të fitojmë çdo tri ditë, por aktualisht nuk jemi në atë nivel”.

“Nuk do të dorëzohem në këtë kompeticion. Përderisa matematika nuk na eliminon, do të luftojmë në këtë garë njësoj si në të tjerat”, përfundoi trajneri i Milanit. /ORAinfo/

Komento:

	Komenti