Besnik Bislimi, kryenegociatori kosovar në dialogun Kosovë-Serbi në Bruksel, ka konfirmuar se një takim është caktuar mes dy delegacioneve për të martën e ardhshme.

Mediat në Serbi gjatë ditës raportuan për këtë takim, por akuzuan palën kosovare se ka refuzuar takimin trepalësh.

Megjithatë, Bislimi thotë se kjo informatë “është rrenë”, pasi, sipas tij, Kosova ka pranuar takimin trepalësh më 17 shtator, sipas agjendës së caktuar nga ndërmjetësi.

“Për bisedimet e ardhshme të procesit të dialogut në Bruksel të vendosura për 17 shtator, Kosova ka pranuar një takim trepalësh sipas agjendës së caktuar nga ndërmjetësi. Fatkeqësisht, Serbia e refuzoi një takim të tillë duke u përpjekur të imponojë pika të rendit të ditës kryesisht për konsum politik të brendshëm”, ka thënë Bislimi në X.

Ai i bëri thirrje Lajçakut që “të mohojë dezinformimin e qëllimshëm nga mediat serbe”, “të cilat thonë në mënyrë të rreme se Kosova ka refuzuar takimin trepalësh të kryenegociatorëve”.

Komento:

	Komenti