Drejtori i Asociacionit të komunave të Kosovës (AKK), Sazan Ibrahimi, i është përgjigjur ministrit të Financave, Punës dhe Transfereve, Hekuran Murati, pasi ky i fundit ka shkruar në Facebook se “Qeveria nuk bllokon llogari, por përmbaruesi me vendime gjyqësore”.
Ibrahimi dhe kryetari i Suharekës, Bali Muharremaj, njoftuan se llogaria e komunës është pasive, pasi kanë marrë email zyrtar nga thesari i Ministrisë së Financave, Punës dhe Transfereve.
“Sigurisht që keni informacion, por dëshiroj të ju informoj se me kërkesë të menaxhemntit dhe duke u bazuar në nenin 40 të LMFPP, sot me datë 28/10.2024, qasje për të gjithë zyrtarët financiarë për debitorin e Komunës së Suharekës janë të pasiv deri sa ë procedohen vendimet gjyqëore/përmbarimore”, thuhet në këtë email.
Duke u bazuar në ketë email, Ibrahimi iu përgjigje Muratit duke i thënë se ai po dezinformon.
“Kush po dezinformon, a janë këta përmbarues apo zyrtar të thesarit të shtetit. Thesari i MFPT e ka dërguar këtë email e jo përmbaruesi”, ka thënë Ibrahimi.
“Pra, ministri po dezinformon e jo AKK”, ka vazhduar ai.
Më herët, kryetari i Suharëks, Bali Muharremaj, në një përgjigje për Gazetën Express, ka thënë se bllokimi i llogarisë komunale do të bllokojë projektet, si dhe do të i pamundësojë komunës që të paguajë operatorët që kanë kryer projektet. /Express/
25 °C
