Shtëpia e Bardhë po planifikon takimin e parë të liderëve për të ashtuquajturin “Bordi i Paqes” të presidentit Donald Trump, lidhur me Gazën, më 19 shkurt, raportoi Axios të premten, duke cituar një zyrtar amerikan dhe diplomatë nga katër vende që janë pjesë e bordit.

Planet për takimin, i cili do të shërbente gjithashtu si një konferencë për mbledhjen e fondeve për rindërtimin e Gazës, janë në faza të hershme dhe mund të ndryshojnë ende, raportoi Axios.

Takimi është planifikuar të mbahet në Institutin Amerikan të Paqes në Uashington, shtohet në raport, duke theksuar se kryeministri izraelit Benjamin Netanyahu pritet të takohet me Trumpin në Shtëpinë e Bardhë më 18 shkurt, një ditë përpara takimit të planifikuar, raporton Reuters

Shtëpia e Bardhë dhe Departamenti Amerikan i Shtetit nuk iu përgjigjën kërkesave për koment.

Në fund të janarit, Trumpi krijoi bordin, të cilin ai do ta drejtojë dhe për të cilin thotë se synon të zgjidhë konfliktet globale, duke bërë që shumë ekspertë të shprehin shqetësimin se një bord i tillë mund të minojë rolin e Kombeve të Bashkuara.

Qeveritë në mbarë botën kanë reaguar me kujdes ndaj ftesës së Trumpit për t’iu bashkuar kësaj nisme. Ndërsa disa nga aleatët e Uashingtonit në Lindjen e Mesme janë bashkuar, shumë nga aleatët e tij tradicionalë perëndimorë deri tani kanë qëndruar larg.