Zhvillime të reja në BE.
Liderët e vendeve anëtare të Bashkimit Europian (BE) miratuan emërimin e Christine Lagarde në krye të Bankës Qendrore Europiane (BQE).
Në samitin e liderëve të BE-së në Bruksel thuhet se është marrë vendimi që Lagarde të emërohet në postin e presidentes së BQE-së duke filluar që nga 1 nëntori. Mandati i saj do të jetë 8 vite.
Më parë liderët e vendeve anëtare të BE-së, në bisedimet e zhvilluara, kishin rënë dakord që presidentja e Fondit Monetar Ndërkombëtar (FMN), Christine Lagarde, të emërohej si presidente e BQE-së në vend të Mario Draghit, detyra e të cilit do të përfundojë.
Për shkak të kandidimit në pozicionin e presidentes së BQE-së, Lagarde ka dhënë dorëheqjen nga detyra e saj në FMN.
Lagarde ishte presidentja e parë femër e FMN-së. Ajo ka qenë në këtë detyrë që nga viti 2011. Lagarde gjithashtu do të jetë presidentja e parë femër në krye të BQE-së.
Biznesmenja dhe avokatja 63-vjeçare me origjinë franceze, Lagarde më parë ka ushtruar detyrën e ministres së Financave në Francë.
BQE e cila përcakton dhe zbaton politikat monetare të BE-së, funksionon si organ i pavarur i Unionit që ka personalitet juridik.
Detyra e BQE-së me bazë në Frankfurt është të sigurojë stabilitetin e çmimeve në Eurozonë, e cila përbëhet nga vendet anëtare të BE-së që përdorin euron si monedhë të tyre.
-1 °C
