Mbi 20 milionë euro ia ka kërkuar “Contour Global” Qeverisë së Kosovës si kompenzim për shpenzimet e projektit përmes një letre të 24 majit, në të cilën në të njëjtën kohë e ka lajmëruar për shkëputjen e kontratës.
Këtë e ka bërë të ditur ministria e Ekonimisë përmes një postimi në Facebook.
Në të shkruhet se letra e “Contour Global” ishte pranuar të dielen, më 24 maj.
“Jemi të befasuar dhe të zhgënjyer që Contour Global ka zgjedhur të njoftojë se synon shkëputjen e marrëveshjeve me Qeverinë dhe të parashtrojë kërkesën e pathemeltë dhe të padrejtë për kinse 20.053.125,63 euro shpenzime të zhvillimit të projektit”, shkruhet në të.
Ministria në të njëjtën kohë ka bërë të ditur se para se drejtuesit e kësaj kompanie ta përgatisnin letrën, ministrja Hajdari i kishte ftuar ata në një telekonferencë për të diskutuar çështjet e projektit të termocentralit “Kosova e Re”.
“Në vend të përgjigjes ndaj ftesës sonë, Contour Global ka dërguar letrën për të njoftuar se synon shkëputjen e kontratave dhe për të kërkuar pagesën”, shkruhet më tutje.
Hajdari, si është bërë e ditur, tashmë i ka njoftuar anëtarët e komitetit për letrën e 24 majit dhe ka thirrur mbledhjen e radhës për të shqyrtuar rastin.
“Hajdari është angazhuar gjithashtu për t’i siguruar komitetit mbështetjen e nevojshme për vendimmarrjen e duhur. Mbështetja do të përfshijë këshillat juridike nga një ekip i përgatitur dhe i dëshmuar”, është bërë e ditur.
-2 °C
