Gazeta spanjolle Sport raporton se Philippe Coutinho është afër transferimit në Arsenal, përderisa shkruan se edhe tre bashkëlojtarë të tij në Barcelonë mund t’i bashkohen atij në Premierligë.

Afati kalimtar i verës tashmë është hapur dhe Barcelona planifikon të shesë sa më shumë lojtarë që s’janë pjesë e planeve të klubit për të ardhmen, shkaku i problemeve financiare, transmeton Express.

Disa negociata raportohet se tashmë janë të faza të avancuara, si ajo për transferimin e Philippe Coutinhos në Arsenal, që do t’ia mundësonte brazilianit kthimin në Premierligë, ku kishte shkëlqyer me Liverpoolin.

Agjenti i Coutinhos, Kia Joorabchian, ka marrëdhënie shumë të mira me drejtuesit e Arsenalit, me të cilët po bashkëpunon edhe për transferimin e Willian nga Chelsea. Arsenali dëshiron t’i shtojë të dy brazilianët në skuadër para se të nisë sezoni i ri.

Një tjetër lojtar i Barcelonës që po shkon drejt transferimit në Premierligës është Martin Braithwaite, pasi West Hami e donte atë edhe gjatë janarit, kur e bleu Barcelona për 18 milionë euro.

E përderisa Barcelona ndihet optimiste për transferimet e këtyre dy lojtarëve, e njëjta s’mund të thuhet edhe për Todibon. Barcelona i do 20 milionë euro plus pesë milionë euro në formë të bonuseve dhe kjo kërkesë e klubit katalonas e ka shuar interesimin e Evertonit.

Komento:

	Komenti