Për çka janë të dënuar ata që s’u lejuan të kandidojnë për deputetë?

Dënimet të cilat ndaluan kandidatët për deputet nga NISMA, AAK dhe VV të kandidojnë në zgjedhjet e shkurtit.

Listat e kandidatëve për deputet u dorëzuan nga të gjitha partitë në KQZ.
Por jo të gjithë personave brenda listave po iu lejohet kandidimi për deputet në zgjedhjet e 14 shkurtit.

Kjo pasi që Komisioni Qëndror i Zgjedhjeve nuk i certifikoi plot 47 persona për kandidim.

E ky mos certifikim u bë për arsye të vendimit të Kushtetueses i cili saktëson se personat të cilët kanë padi gjyqësore në afat kohor prej tre vitesh të mos lejohet të kandidojnë për deputet.

Por disa prej këtyre dënimeve dolën të jenë dënime të thjeshta trafiku në vlerë më pak se 20 euro.

Në listën e Vetëvendosjes pos Albin Kurtit, Albulena Haxhiut, Bajram Mavriqit dhe Liburn Aliut kandidimi iu ndalua edhe Labinotë Demi Murtezit.

Për disa nga ta tashmë dihet se janë të dënuar për hedhje të gazit lotsjellës në Kuvend.

Mirëpo ish deputetes nga radhët e lëvizjes Vetëvendosje, Labinotë Demi Murtezit vendimi i KQZ-së dhe pastaj edhe i PZAP-së për mos certifikim i duket i padrejtë.

Kjo e fundit u dënua për një aksident trafiku.

E ky nuk është rasti i vetëm që po konsiderohet si padrejtësi ndaj kandidatëve të partive.

Në AAK nuk po iu lejohet pjesëmarrja në zgjedhje Shemsedin Dreshaj, Shqipe Kastrati, Rrahim Ajeti.

E nga kjo parti po thonë që Shemsedin Dreshajt i janë bërë tri vite e tri ditë në kohën kur u dorëzuan listat për certifikim.

E gjoba e tij thuhet të ketë kushtuar 18 euro.

Prandaj sipas kryetarit të kësaj partie Ramush Haradinaj, Dreshaj nuk përfshihet tek kandidimet që u ndaluan për shkak të dënimeve të marra në afat prej 3 vitesh.

Ndërkohë sipas analistit Yll Zeka dërgimi i ankesave në Gjykatën Supreme nuk do ta ndryshojë vendimin e marrë nga Kushtetuesja.

Ndonëse për raste specifike edhe mund të bëhen përjashtime.

Zeka shton se në bazë të vendimit të Gjykatës Kushtetuese nuk ka rëndësi se në çfarë vlere janë gjobat apo dënimet që kandidatët mund t’i kenë marrë.

E pos AAK-së e Vetëvendosjes edhe 12 persona nga NISMA nuk u certifikuan.

Komento:

	Komenti