Kanë kaluar dhjetë ditë nga zgjedhjet parlamentare të 9 shkurtit 2025, përderisa Komisioni Qendror i Zgjedhjeve (KQZ) nuk ka arritur t’i numëroj të gjitha votat për subjektet politike e as për kandidatët për deputetë.
Në ueb faqen e KQZ-së potencohet se deri më tani janë numëruar 99.72% të votave, pa i përfshirë votat me kusht, votat e personave me nevoja të veçanta dhe votat jashtë Kosovës, me ç’rast VV-ja ka fituar 40.84% të votave, PDK-ja 22.05%, LDK-ja 17.67% dhe AAK-ja 7.45%.
Vonimi i shpalljes së rezultateve zgjedhore nga Komisioni Qendror i Zgjedhjeve ka shkaktuar shqetësime të konsiderueshme në opinionin publik.
Problemet teknike gjatë procesit të numërimit të votave, përfshirë gabime në sistemet elektronike dhe vonesa në përpunimin e të dhënave, kanë shtuar dyshimet mbi transparencën dhe saktësinë e rezultatit përfundimtar.
Kjo ka krijuar një atmosferë pasigurie dhe ka ngritur pyetje për mundësinë e manipulimit të procesit zgjedhor, duke minuar besimin e qytetarëve në integritetin e zgjedhjeve.
Për ish-kreun e KQZ-së, qytetarët s’duhet të kenë vend për dyshime, derisa për njohësit e çështjeve politike, dyshimet ekzistojnë në procesin zgjedhor të zgjedhjeve të fundit në Kosovë.
Ish-kreu i KQZ-së garanton integritetin e zgjedhjeve: Nuk ka mundësi manipulimi i votave
Ish-kryetari i Komisionit Qendror të Zgjedhjeve, Mazllum Baraliu, ka folur për “Front Online” lidhur me vonesën e publikimit të rezultateve përfundimtare të zgjedhjeve të 9 shkurtit, duke sqaruar se kjo është shkaktuar nga probleme teknike.
Megjithatë, Baraliu ka paralajmëruar se nuk dihet ende se sa do të zgjasë ky proces.
Ai ka siguruar opinionin publik se procesi zgjedhor nuk do të preket dhe se integriteti i tij është i garantuar.
“Kjo vonesë ndodhi për shkak të probleme teknike dhe kanë filluar të rikuperohen. KQZ ka filluar të bëjë verifikimin e rezultateve të votave të subjekteve politike në teren dhe numërimin për kandidatët për deputet. Kjo vonesë nuk dihet sa do të zgjasë. Nuk do të jetë i prekur dhe cenuar procesi i integritetit të procesit zgjedhor”, shprehet Baraliu.
Për herë të parë, ka shtuar Baraliu se mbikëqyrja është 100% teknike, duke eliminuar çdo mundësi për dyshime.
“Nuk mund të ketë manipulime të votave kur kemi monitorime të pandërprerë nga kamerat se prania e vëzhguesve është aty. Për herë të parë është kjo mbikëqyrke 100% teknike, s’duhet të ketë dyshime nga askush”, deklaroi Baraliu.
Tahiri-Beqa: Procesi zgjedhor i 9 shkurtit ka ngritur dyshime dhe pasiguri
Njohësja e çështjeve politike, Arta Tahiri-Beqa është prononcuar për “Front Online” mbi vonesën e publikimit të rezultateve të zgjedhjeve të 9 shkurtit, duke theksuar se ky është një proces precedent që nuk ka ndodhur kurrë.
“Që nga shpallja e Pavarësisë së Kosovës një proces precedent si ky nuk ka ndodhur, çdo herë është vlerësuar procesi zgjedhor dhe shpallja e rezultateve për një kohë rekord”, tha Tahiri-Beqa.
Sipas Tahiri-Beqës, ky proces, që ishte promovuar si më i shpejti, ka përfunduar në mënyrë negative, duke shkaktuar reagime të shumta dhe mosbesim te votat.
“Ky proces kinse më i shpejtë për daljen e rezultateve, rezultoi më negativi. Ka reagime të shumta për mos esim të votave dhe dyshime. Është situatë e paqartë”, shprehet ajo.
Analisti Sadiku: Dështimi i sistemit digjital rriti dyshimet për manipulim në zgjedhje
Analisti politik, Arbnor Sadiku, ka vlerësuar për “Front Online” se dyshimet për manipulim të votave janë rritur për shkak të papërgjegjësisë që shoqëroi dështimin e sistemit digjital të KQZ-së.
Sipas Sadikut, problemi i KQZ-së ka krijuar mosbesim tek qytetarët, duke u shkaktuar shqetësime për zgjatjen e tepërt të procesit dhe mungesën e transparencës.
“Dyshimet janë të mëdha për manipulim për shkak papërgjegjësisë që dështoi sistemi digjital i numërimit të votave dhe kaluam në sistem manual, kjo e zbehu ditën e mirë të zgjedhjeve që kaloi me një proces të mirë zgjedhor. Problemi i KQZ, krijoi mosbesim tek qytetarët se po zgjatë shumë si proces”, thotë ai.
Të martën, zëdhënësi i KQZ-së, Valmir Elezi, në një konferencë për media ka folur edhe për hetimet që po ndodhin nga Prokuroria rreth dyshimeve të ngritura për parregullsi në zgjedhje dhe për problemet që kanë ndodhur me faqen e KQZ-së në natën e 9 shkurtit.
Elezi ka thënë se adresa për pyetje rreth hetimeve është Prokuroria e Shtetit dhe vetëm ata mund të flasin për procesin e hetimit, ndërkohë që ka shtuar se KQZ është e gatshme të ofrojë të gjitha materialet e nevojshme që i nevojiten Prokurorisë për hetimin.
“Është prokuroria që mund t’iu japë përgjigje për natyrën e hetimeve që është duke i zhvilluar. Ne si KQZ ofrojmë të gjitha materialet e nevojshme për hetimin”, ka thënë Elezi.
4 °C
