Me ftesën e kancelares Angela Merkel dhe presidentit Emanuel Macron sot në Berlin do të mbahet një samit ku do të mblidhen liderë të Ballkanit Prëndimor.

Samiti i shumëdiskutuar i Berlinit është pasqyruar gjerësisht në medien gjermane, me gazetën “Die Welt” që shkruan se Merkel po mbron trashëgiminë e saj në Ballkan.

Kryeministri kosovar, Ramush Haradinaj mohoi më herët ekzistencën e një drafti konkluzionesh të konferencës, por “Die Welt” këmbëngul se kancelarja gjermane ka një synim të qartë dhe ai është ripërcaktimi i kufijve në rajon.

Kjo gazetë shkruan se, shqetësimi për një nga rajonet më të pastabilizuara të Evropës është konstante e politikës së jashtme të Merkelit. Që nga fillimi, ajo ndoqi një politikë konsekuente në Ballkan. Berlini e kuptoi vonë se, Vuçiq, me një fushatë të zgjuar ia doli të bënte për vete, për idenë e këmbimit të territoreve, të ngarkuarën e BE-së për Politikën e Jashtme, Federica Mogherini, një liberale e majtë.

Italiania dëshiron që ta kurorëzojë me një projekt të madh mandatin e saj që po shkon drejt fundit, e që mund të interpretohet si hap drejt pajtimit në rajon. Por, në zyrën e kancelares i tremben të kundërtës.

Një ndarje e plotë mes shqiptarëve dhe serbëve në Kosovë nuk mund të arrihet. Çdo ndryshim kufijsh do të çonte në një debat të ri për ndryshime të tjera, në akte kërcënuese, armatim, e në rastin më të keq edhe në luftë, shkruan tutje kjo gazetë.

Por, a është Merkeli aq e fortë sa t’i japë fund debatit për kufij të rinj? “Përgjigjen për këtë do ta japë takimi sot”, thotë “Die Welt”.

Ndërkohë, presidenti i Kosovës, Hashim Thaçi deklaroi përpara samitit se nuk mund të ketë dialog apo negociata pa Shtetet e Bashkuara të Amerikës. /Tch

Komento:

	Komenti