Familja nga Prizreni detyrohet të hyjë në kredi për t’i paguar barnat për babain e shtrirë në Intensivë

Familja Z. nga Prizreni janë detyruar të marrin kredi për të mbuluar shpenzimet e kryefamiljarit i cili është i shtrirë që 5 javë në intensivën e QKUK-së. Deri më tani kanë shpenzuar rreth 1650 euro. QKUK nuk ka dhënë përgjigje nëse do të furnizojnë pacientët me barnat që mungojnë.

Listë e gjatë e barnave dhe materialeve është duke munguar në Mjekimin Intensiv Qendror në Qendrën Klinike Universitare të Kosovës. Disa familjarë detyrohen të qëndrojnë 24 orë në hollin e intensivës pasi në çdo moment mund të paraqitet nevoja për ndonjë ilaç për pacientët, e të cilat duhet t’i blejnë në barnatoret private pasi mungojnë në spital.

Komuna e Prishtinës vazhdon me dizinsektimin, ka një kërkesë për qytetarët

Kompania e dyshuar për vdekjen e pacientëve nga oksiduli, përfiton sërish tender për gaz
Shpenzimet e familjarëve janë të mëdha, duke marr parasysh edhe faktin se barnat për pacientët e intensivës janë të shtrenjta. Kostoja e tyre mund të shkoj deri në 150 euro brenda ditës, pohojnë disa familjarë, shkruan Gazeta Shneta.

A.Z. e ka babanë e shtrirë në intensivë që pesë javë. Pacienti L.Z. kishte rënë në koma pas tri operacioneve që i ishte nënshtruar brenda 10 ditëve. I biri i tij udhëton çdo ditë nga Prizreni për të qenë afër babait, por edhe për të blerë barnat që mungojnë në spital. Ai thotë se për 5 javë qëndrim kanë paguar rreth 1650 euro për barna.

“Kemi marr kredi për të mbuluar shpenzimet. Unë, nëna dhe motra ndaras kemi marr kredi të shpejtë në I*** Credit. Deri tash askush nuk na ka ndihmu. Po e kemi shumë të vështirë sepse përveç barnave kemi edhe shpenzimet të udhëtimit e ushqimit”, deklaron A.Z. teksa tregon dhjetëra receta dhe kuponë fiskal të barnatoreve të cilat i ka ruajtur të gjitha.

Edhe familjarë të tjerë ankohen për shpenzime të mëdha për shkak të mungesës së barnave. “Nuk kena asnjë vërejtje sa i përket kujdesit të stafit mjekësor, por po mungojnë shumë barna e materiale. Po na kushtojnë shtrenjtë sidomos disa lloje të antibiotikëve”, thotë një tjetër familjar.

Gazeta ka mësuar se mjekët në intensivë shpeshherë detyrohen që t’i huazojnë barnat për pacientët që iu përkeqësohet gjendja, nga pacientë të tjerë. E lista e barnave dhe materialeve që mungojnë është e gjatë, nga barna jetike për pacientët e deri te kanila: 1. Noradrenaline; 2. Dopamine; 3. Dobutamine; 4. Fraxiparine; 5. Hydralazine; 6. Fresubine; 7. Bikarbonate; 8. Antibiotike: Tazocine, Colisitine; 9. Katetera aspiratave; 10. Kanila te traheostomes.

Por QKUK nuk ka dhënë sqarime për publikun se kur do të furnizohen pacientët e intensivës me këto barna. Gazeta ka pritur tre ditë për të marr një përgjigje nga drejtoresha e Barnatores Gëzime Pllana, por ajo nuk ka pranuar të jap sqarime.

Kujtojmë se vetëm një ditë më parë në QKUK qëndroi ministri i Shëndetësisë Uran Ismaili së bashku me shefin e tij të PDK-së, Kadri Veseli. Të dy në deklaratat e tyre kanë thënë se po reformojnë shëndetësinë dhe po ulin shpenzimet nga xhepi i qytetarëve. Madje edhe më herët u patën zotuar se pacientët nuk do të kenë më nevojë të blejnë barna. Por mungesa e tyre po vazhdon tash e disa vite me radhë.

Komento:

	Komenti