Punësimet në PTK po vazhdojnë më të madhe.
Kohëve të fundit kanë qenë të shpeshta raportimet e medieve për punësimet e familjarëve të zyrtarëve të Aleancës për Ardhmërinë e Kosovës në Telekom. Periskopi merr vesh që nga janari valës së këtyre punësimeve iu është shtuar edhe djali i deputetes së kësaj partie, Teuta Haxhiut, Ilirian Haxhiu….
Periskopi merr vesh se djali i deputetes Haxhiu iu është bashkuar stafit të punëtorëve të Telekomit në janar të këtij viti.
Foto: Djali i Teuta Haxhiut
Kjo ndodhi pikërisht në kohën kur filloi me të madhe punësimi i familjarëve të zyrtarëve të kësaj partie në këtë ndërmarrje publike.
Madje, Iliriani nuk ka hezituar aspak që të bëjë publik angazhimin e tij në këtë ndërmarrje.
Me t’u punësuar në Telekom, ai bëri një publikim në rrjetin social “Facebook” kur tregoi për angazhimin e tij në këtë ndërmarrje.
Ndonëse, nuk tregoi se në çfarë pozite po punon aty.
Për këtë çështje, Periskopi ka kontaktuar deputeten Teuta Haxhiu, e cila ka mohuar që pozita e saj ka ndikuar në punësimin e djalit të saj.
Madje, thotë se po të pyetej si nënë, kurrë nuk do të donte të shihte fëmijët e saj duke punuar në atë ndërmarrje që tani më shumë se kurrë ka nevojë për rimëkëmbje.
“Po të isha pyet së pari si një nënë, kisha thanë në Telekom jo kurrë. Kjo kompani ka nevojë me u rimëkëmb. Por, Iliriani është një nga katër fëmijët e mi që janë të moshës madhore. Jo vetëm që nuk kam ndikuar, por po e them që me dëshirën më të madhe nuk kisha dashur ta shoh të punësuar aty”, ka thënë Haxhiu për Periskopin.
Ajo ka folur edhe për kritikat që shpërthyen kohëve të fundit ndaj zyrtarëve të partisë së saj, për punësimin e familjarëve në Telekom.
“Unë i shoh të arsyeshme kritikat sepse me të vërtet Kompania ka nevojë për rimëkëmbje, pasi dikur ka qenë kompani që e ka mbush buxhetin e Kosovës. Tanimë ajo nuk është në gjendje të mirë. Iliriani po i bon 25 vjet. Nuk ka qenë dëshirë e imja që ai të fillojë punën në këtë kompani”, ka përsëritur edhe njëherë tjetër Haxhiu.
Para pak çastesh në media u bë e ditur se së fundmi në Telekom është rehatuar edhe e fejuara e djalit të ministrit që vie nga AAK, Pal Lekajt, Doruntina Gashi.
Foto: Reja e Pal Lekajt
Edhe ajo u punësua në Telekom gjatë periudhës 2018-2019.
Ajo punën e filloi pas rreth dy muajsh trajnimesh që pati në Telekom.
Ndërkohë, gjatë ditës së djeshme u raportua edhe për dy punësime të tjera të familjarëve të zyrtarëve të AAK’së në Telekom.
Nga 1 gushti i vitit 2018 në këtë ndërmarrje ka nisur punën edhe burri i deputetes Donika Kadaj Bujupi.
Foto: Burri i Donika Kadajt-Bujupi
Pas 20 viteve si i papunë, juristi u angazhua në Telekom si agjent i shitjes.
Edhe deputetja Kadaj Bujupi mohoi se pozita e saj si deputete ka ndikuar në punësimin e burrit të saj, ndonëse nuk arsyetoi faktin se punësimi i tij u bë pikërisht në kohën kur AAK është pjesë e koalicionit qeverisës dhe po menaxhon me këtë ndërmarrje publike.
Në gusht të vitit të kaluar, kontratë në Telekom mori edhe djali 28 vjeçar i deputetit Muharrem Nitaj.
Ai u punësua më 28 gusht, si zyrtar i marketingut.
Foto: Djali i Muharrem Nitajt
Sipas një raporti zyrtar të Telekomit, 234 persona janë punësuar në periudhën shkurt 2018- 2019.
Në total, Telekomi ka 2 mijë e 540 punëtorë, për dallim prej 2 mijë e 295 sa kishte në vitin 2016.
-3 °C
