Eduard Kuçi ka qenë së fundmi i ftuar në emisionin “Big Talk”, ku ka folur për rrugëtimin e tij dhe përvojën brenda shtëpisë së Big Brother VIP Kosova 4, një eksperiencë që e ka mbajtur shpesh në qendër të vëmendjes për shkak të karakterit të tij të drejtpërdrejtë dhe deklaratave pa filtra.

Gjatë intervistës, ai u përball me disa pyetje nga opinionistja e programit, Xheneta Fetahu, të cilat synonin të rikthenin diskutimin te dinamika dhe raportet e krijuara gjatë qëndrimit të tij në reality shoë.

Një nga pyetjet e parashtruara kishte të bënte me marrëdhëniet brenda shtëpisë dhe me preferencat e tij, konkretisht nëse nuk do të ishte Dolce banore e këtij edicioni, cila nga vajzat e tjera do të ishte më e përshtatshme për të.

Pyetja, e cila në thelb synonte një përgjigje të zakonshme apo një reflektim mbi afrimitetet e krijuara gjatë lojës, mori një përgjigje të papritur nga Eduard Kuçi, i cili u shpreh në mënyrë provokuese dhe banale, duke thënë “Cila të kish hangër e para”.

Kjo deklaratë solli menjëherë reagimin e Xheneta Fetahut, e cila e ndali dhe i vuri në dukje se një mënyrë e tillë shprehjeje nuk ishte e përshtatshme, sidomos kur bëhej fjalë për femrat.

Ajo u shpreh hapur se një përgjigje e tillë nuk ishte korrekte dhe se duhej treguar më shumë respekt në komunikim.

Megjithatë, Eduard Kuçi nuk u tërhoq nga qëndrimi i tij, duke u justifikuar me faktin se ai është i tillë si karakter dhe se kjo anë e tij është e njohur tashmë për publikun, duke thënë se Xheneta e njeh shumë mirë dhe se ai nuk di të shtiret apo të ndryshojë mënyrën e të shprehurit.

Pas transmetimit të kësaj bisede, reagimet në rrjetet sociale nuk munguan. Shumë ndjekës dhe shikues të emisionit e kritikuan ashpër mënyrën e të shprehurit të Eduard Kuçit, duke e cilësuar deklaratën e tij si fyese dhe denigruese ndaj femrave.

Kritikat u përqendruan jo vetëm te kjo përgjigje konkrete, por edhe te fakti se ai, sipas tyre, vazhdon të shfaqë të njëjtën sjellje dhe mentalitet që ka demonstruar edhe gjatë qëndrimit në Big Brother VIP Kosova, ku shpeshherë është komentuar për gjuhën e drejtpërdrejtë dhe mungesën e filtrit në komunikim.

Nga ana tjetër, pati edhe zëra që e mbrojtën, duke argumentuar se Eduard Kuçi thjesht po tregohej autentik dhe se nuk po bënte asgjë më shumë sesa të shfaqte karakterin e tij të vërtetë, ashtu siç ka qenë gjithmonë, pa u përpjekur të përshtatet me pritshmëritë e publikut apo të moderonte deklaratat për hir të imazhit.

Megjithatë, debati mbetet i hapur, pasi kjo ngjarje ka rikthyer edhe një herë diskutimin mbi kufijtë e humorit, mënyrën e komunikimit në media dhe respektin ndaj femrave, sidomos kur bëhet fjalë për figura publike që ndikojnë në opinionin e gjerë./ORAinfo/

Komento:

	Komenti