Legjenda e Milanit, Ruud Gullit, ka kërkuar që klubi kuqezi t’i japë kohë trajnerit Ruben Amorim për të ndërtuar projektin e tij, duke vlerësuar punën e portugezit si te Manchester United, ashtu edhe në Milano.

Gullit është një prej figurave që ka përjetuar disa nga periudhat më të suksesshme në historinë e Milanit. Holandezi iu bashkua “Rossonerëve” nga PSV Eindhoven në verën e vitit 1987, për një shumë rekord në atë kohë prej 13.5 miliardë liretash, dhe qëndroi në klub deri në vitin 1993, përcjell ORAinfo.

Ai ishte një prej yjeve të Milanit të drejtuar nga Arrigo Sacchi dhe më pas nga Fabio Capello. Në total, Gullit zhvilloi 171 ndeshje zyrtare me fanellën kuqezi, duke shënuar 56 gola dhe dhënë 38 asistime.

Gjatë aventurës së tij në “San Siro”, ai fitoi 12 trofe, mes tyre tre tituj të Serie A, dy Kupa Evropiane, dy Superkupa të Evropës dhe dy Kupa Interkontinentale. Së fundmi, emri i tij është përfshirë edhe në Hall of Fame të Milanit.

Gullit: Milani është në një fazë tranzicioni

Në një intervistë për gazetën spanjolle “MARCA”, Gullit foli edhe për Ruben Amorimin dhe fillimin e aventurës së tij te Milani.

“Amorim bëri mirë te Manchester United dhe mendoj se po bën mirë edhe te AC Milan, por ata janë gjithashtu në një fazë tranzicioni. E vetmja mënyrë për të mësuar se si të dalësh nga kjo situatë është të jesh më kreativ”, u shpreh Gullit.

Holandezi foli gjithashtu për nivelin dhe pagat në Premier League, duke theksuar se pagat e larta nuk nënkuptojnë domosdoshmërisht se aty luajnë lojtarët më të mirë.

“Premier League ka para, por kjo nuk do të thotë gjithmonë se ka lojtarët më të mirë në Angli. Ata janë më të paguarit, por kjo nuk do të thotë se janë më të mirët”, deklaroi ish-ylli i Milanit. /ORAinfo/

Komento:

	Komenti