Haradinaj vazhdon ta godasë Kryeministrin për shuarjen e “Task Forcës” kundër korrupsionit – Ora Info Ballina | ORAinfo.com - Nuk ndalet

Haradinaj vazhdon ta godasë Kryeministrin për shuarjen e “Task Forcës” kundër korrupsionit

15:54 | 24 Tetor 2020

Kryetari i AAK’së vazhdon ta godasë Kryeministrin për shuarjen e “Task Forcës” kundër korrupsionit.

Ramush Haradinaj ka nisur të japë edhe leksione juridike Shefit të Qeverisë, Avdullah Hotit, sa i përket zbatimi të Kushtetutës.

Lideri i AAK’së ka thënë se sa herë Kushtetuta është respektuar për një parti ka dalë keq.

“Gjatë jetëgjatësisë së demokracisë së vendit tonë, sa herë që Kushtetuta e Republikës është zbatuar për interesat e një partie të caktuar, ka dalë të jetë e gabuar”, ka thënë ai.

Reagimi i Haradinajt erdhi pasi Hoti tha se politika nuk duhet të përzihet në drejtësi dhe duhet të respektohet kushtetuta edhe sa i përket policisë.

“Politika nuk duhet të përzihet në drejtësi. Këtë e kemi bërë me vendimet që kemi marr në këta muaj të qeverisjes. Drejtësia duhet ta bëjë punën sipas ligjit, e jo sipas vendimeve të Qeverisë. Kthimi i ligjshmërisë dhe kushtetutshmërisë në vend duhet të jetë angazhim i të gjithëve”, ka shkruar Hoti, në një reagim.

“Siguria juridike garantohet vetëm duke respektuar Kushtetutën, ligjet dhe institucionet shtetërore”, ka shtuar ai.

Haradinaj doli kundër vendimit të Qeverisë për të shkarkuar një mekanizëm brenda Policisë së Kosovës i krijuar me vendim të Kryeministrit në vitin 2010.

Kjo task forcë kishte nisur arrestimin e figurave publike të profilit të lartë që dyshoheshin për korrupsion. Në shënjestër të tyre ishin edhe së paku tre kryetarë komunash.

Kundër shuarjes së kësaj task force kanë dalë edhe vendet e BE’së.

Komento: