Ai shpresonte të bënte një implant dhëmbësh në një kohë të shkurtër dhe të shpenzonte shumë më pak se në Itali.

Kështu Simone Delvecchio, një 37-vjeçar, web designer nga Barletta, Pulia vendosi ta bënte operacionin në Tiranë, si nëna e tij dy vite më parë.

Por nuk shkoi mirë dhe komplikimet, thotë binjaku i tij Marco për Corriere della Sera, e kanë detyruar të shkojë në spital për 8 muaj.

Pas operacionit të 13 marsit, në të cilin u hoqën njëzet dhëmbë në një seancë, ai pati 4 arreste kardiake. Ai është ende i shtruar në spital në San Giovanni Rotondo, vigjilent, por i qetësuar.

Familja ka nisur veprimet ligjore mes njëmijë vështirësish.

“Gjithçka nisi 13 marsin e kaluar, kur Simone, i tërhequr nga një reklamë që premtonte rezultate të shkëlqyera me çmime konkurruese, vendosi të shkonte në Tiranë për të vendosur implante dentare në të dy harqet. Megjithatë, pak pas operacionit, u ndje keq dhe pësoi katër arreste kardiake”, tregon vëllai.

I rikthyer në Itali, pasi u shtrua në terapi intensive në spitalin e Tiranës, 37-vjeçari ndodhet ende i shtruar në një klinikë në San Giovanni Rotondo dhe ditët e fundit do t’i duhet t’i nënshtrohet një operacioni të ri për një stenozë trakeale.

Kalvari dhe beteja e familjes për të marrë drejtësi

Familja e Simone Del Vecchio-s ka nisur veprimet ligjore, “por kemi shumë probleme që lidhen me faktin se është një vend që nuk është pjesë e Bashkimit Europian dhe vështirësitë në gjetjen e dokumenteve të ndërhyrjes”, shpjegon vëllai i tij Marko.

Atë ditë në klinikën e Tiranës ndodhej edhe nëna, e cila kishte bërë të njëjtin operacion dy vite më parë, pa probleme. “Ka kaluar tetë ditë në terapi intensive në Tiranë dhe më 21 mars e çuam me ambulancë në Poliklinikën e Barit në reanimacion”, shpjegon vëllai i tij.

Pas daljes nga koma, në qershor ndodhi një ndërlikim i ri. “Ai u transferua në departamentin e sëmundjeve infektive për shkak të një infeksioni bakterial ngjitës, Candida auris, i cili e vonoi edhe më shumë shërimin e tij, sepse ai nuk ishte në gjendje të bënte rehabilitim”.

Dhe tani, pasi u zhvendos në San Giovanni Rotondo, ai është në pritje të një operacioni të ri për të zvogëluar rrezikun e mbytjes për shkak të stenozës së trakesë (ndoshta për shkak të periudhës së gjatë të intubimit) që nuk e lejon atë të pijë, të hajë dhe të marrë frymë mirë.