Vetëvendosje dhe LDK janë duke u koordinuar për krijimin e qeverisë së re.

Udhëheqësi i Grupit punues nga radhët e LDK-së për negociata me VV-në, Avdullah Hoti paralajmëron se shumë shpejt do të përmbyllen diskutimet e grupeve punues në mes këtyre dy partive për koalicionin qeverisës.

Anëtari i Kryesisë së LDK-së, Avdullah Hoti, tha se ka përafrime të mëdha mes dy partive, të cilave mbetet që liderët Isa Mustafa dhe Albin Kurti t’ua japin vulën përfundimtare të marrëveshjes.

Pas pak çastesh nis edhe takimi i katërt i grupeve punese, që sipas Hotit në takim do të jenë përfaqësues të këshillit të ekspertëve për fushën e rendit dhe ligjit.

“Sot kemi takimet për rend dhe ligj, madje vazhdojmë takimet tjera për arsim dhe shëndetësi. Besoj se shpejt mund ta përmbyllim komplet diskutimin sa u përket grupeve punuese. Pra, të përafrimeve të programeve të subjekteve, prandaj, mbetet që liderët e dy subjekteve të ulen së bashku dhe të japin vulën përfundimtare të marrëveshjes”, theksoi Hoti.

Hoti nuk përjashton mundësinë që në nëntor të formohet qeveria e re dhe të konstituohet Kuvendi, por ‘hatri’ i këtij të fundit po i mbetet te KQZ-ja që po e zvarrit tash e gati një muaj procesin e numërimit të votave.

“Është e pakuptimtë kur qytetarët e vendit që pas një procesi zgjedhor më 6 tetor që u vlerësua që është i rregullt dhe në përputhje me standardet demokratike, institucionet përgjegjëse tash për të proceduar atë rezultat zgjedhor dhe për të shpallur atë rezultat zgjedhor gati një muaj bëhet dhe nuk janë në gjendje të nxjerrin rezultatin, të nxjerrin vullnetin e qytetarëve, që ta certifikojnë vullnetin e qytetarëve”, thotë Hoti.

Komento:

	Komenti