Irani ka pezulluar bisedimet me Shtetet e Bashkuara në shenjë proteste ndaj veprimeve të Izraelit në Liban, raportoi të hënën agjencia gjysmëzyrtare e lajmeve Tasnim, shkruan CNN.

“Duke pasur parasysh vazhdimin e sulmeve të regjimit izraelit në Liban dhe duke marrë në konsideratë se Libani kishte qenë një nga parakushtet për armëpushimin – i cili tani është shkelur në të gjitha frontet, përfshirë Libanin – ekipi negociator iranian po pezullon ‘bisedimet dhe shkëmbimet e teksteve përmes ndërmjetësve’”, raportoi Tasnim.

Irani kërkon ndalimin e menjëhershëm të luftërave të Izraelit në Gaza dhe Liban, si dhe tërheqjen e plotë të ushtrisë izraelite nga Libani, tha Tasnim, duke shtuar se “derisa qëndrimi i Iranit dhe i rezistencës për këto çështje të plotësohet, nuk do të ketë negociata”.

Tasnim shtoi se Teherani dhe grupet militante aleate në rajon kanë vendosur në agjendën e tyre “mbylljen e plotë të Ngushticës së Hormuzit dhe aktivizimin e fronteve të tjera”, përfshirë ngushticën Bab el-Mandeb në skajin jugor të Detit të Kuq, ku rebelët Huthi të Jemenit, të mbështetur nga Irani, kanë kryer më parë sulme ndaj anijeve që kalonin nëpër të.

CNN ka kontaktuar Shtëpinë e Bardhë për koment.

Më herët të hënën, kryeministri izraelit Benjamin Netanyahu urdhëroi ushtrinë izraelite ta godiste lagjen Dahieh të Bejrutit, periferinë jugore të qytetit që konsiderohet bastion i Hezbollahut. Një zyrtar izraelit i tha CNN-it se planet për ta goditur Bejrutin ishin koordinuar me SHBA-në.