Dje Lëvizja Vetëvendosje ka publikuar një video ku sulmohen figurat që kanë qenë në pushtet në vitet e kaluar, para se partia e Albin Kurtit të vijë në pushtet.
Në mesin e këtyre figurave, që sipas VV-së e kanë shkatërruar Kosovën, është edhe ish-kryeministri Isa Mustafa. Për këtë të fundit, kjo video është “sjellje idioteske”.
Në një prononcim për Gazetën Express ish kryetari i LDK-së, Isa Mustafa, ka thënë se videoja e VV-së është e ngjashme “me një bandë të drejtuar nga e veja e Mao Ce Dunit, që organizonte dhe poshtëronte figura të rëndësishme kineze”.
“Në kohën e Revolucionit Kulturor Kinez, një bandë e drejtuar nga e veja e Mao Ce Dunit organizonte dhe poshtronte figura të rëndësishme kineze. Çdo gjë dukej ngjashëm me videon e VV-së; mungon vetëm e veja e Maos (e cila më vonë përfundoi në burg për persekutimet që i bëri)”, tha Mustafa për Express.
Sipas tij, kjo video “shpërfaqë mënyrën më idioteske të sjelljes së një partie që ka fituar zgjedhjet në një shoqëri demokratike”.
Në videon e publikuar nga VV shihen edhe Hashim Thaçi, Kadri Veseli, Ramush Haradinaj, Isa Mustafa, Fatmir Limaj, Behgjet Pacolli, Lumir Abdixhiku, Memli Krasniqi e Sami Lushtaku. Madje në këtë video shfaqen edhe fotografitë e Rrahman Jasharajt e Ymer Ymerit të SBASHK-ut.
“Shkatërruesit e shtetit që nuk duan ta shohin Kosovën mirë për 20 vite kanë qeverisur vendin. Herë vetëm e herë njëri me tjetrin. Formalisht të ndarë në parti të ndryshme por praktikisht në një qëllim: Rreth Kosovës së përbashkuar që e shihni veç si tender, si ryshfet, si haraç, si krim, si korrupsion e si çka tjetër. Ishte vetëm një subjekt që s’ishte në anën e tyre, VETËVENDOSJE!”, thuhet ndër të tjerash.
Lidhur më këtë video, mbrëmë përmes një lidhje telefonike, u deklarua Sami Lushtaku, i cili është pjesë e kësaj videoje.
Lushtaku ka thënë se i vjen keq që janë vendosur në video ish krerët e UÇK-së që janë në Hagë.
“Më erdhi keq për ata që janë në Hagë. Unë edhe ata që janë në Hagë jemi mësu me kësi videosh në kohën e MIlloshoviqit, kur fotografia e ime dhe bashkëluftëtarëve të mi, ka qenë vazhdimisht në mjetet e informimit serb”, ka thënë ai.
Lushtaku ia ka sllavizuar mbiemrin Kurtit, duke e quajtur “Kurtoviq”, ndërkohë që e ka ftuar që ta aktivizojë drejtësinë mbi të nëse ka dyshime për vepra penale.
3 °C
