Faton Hajrizi, i burgosuri që u arratis të shtunën për herën e nëntë nga burgjet e Kosovës është shfaqur në rrjetin social TikTok.
Hajrizi i shfaqur me maskë ka treguar se ka pësuar një lëndim nga arratisja e tij.
Ai si arsye për ikjen nga burgu ka përmendur trajtimin sipas tij jo të duhur që i është bërë, ndërkaq ka thënë se ndodhet jashtë Kosovës dhe nuk kthehet në burg.
“Jam larguar nga ai vend se më është bërë zullum në atë vend. Psiqikisht më është bërë zullum, nuk kam mundur më. Në këtë gjendje nuk kthehem më në burg. Aty vuajnë të burgosurit, nuk ipet kushti, nuk trajtohen të gjithë njësoj”, ka thënë ai, shkruan Reporteri.net.
Hajrizi tutje ka shtuar se ditëve në vijim do të hyj live në “TikTok” dhe do të flas më gjerësisht.
Ai thotë se nuk është ashtu siç e pasqyron policia.
“I falënderoj shumë përkrahësit e mi, edhe ata që bëjnë kritika ju përgjigjna pozitivisht. Nuk jam ai që policia e pasqyron. Unë jam Faton Hajrizi i cili si 14 vjeçar ka qenë në luftë. Unë jam Faton Hajrizi që kam vepruar në veri 2006-2007 për të mirën e këtij vendi. Nuk është normale unë me i mbajt 23 vite burg, 15 vjeçar kam rënë në burg e 40 vjeçar jam sot. Me ardh mbikëqyrësi që në kohën e Serbisë ka qenë oficer e më m’thanë mu qu prej gjumit në ora 09:00, 11:00 e ora 18:00. Nuk është në rregull pse mem provoku ai mua”, thotë i arratisuri nga burgu.
“Unë jam Fajton Hajrizi që jom kon 14 vjeçar në luftë e që ka marrë armën e kam shku në radhët e UÇK-së, jam i cili kam vepruar anës Ibrit në veri në vitet që unë i di. Unë kam vepru aty kur kam qenë në arrati 2006-2007 për të mirën e këtij vendi. Jam ai që rojet e Ibrit që i kam shti me ik, unë jam ai . Po e them publikisht për herë të parë. Jam ai, unë i vetëm. Nuk jam armik i popullit, e du shtetin por e du qysh duhet, jo shtetin e sotit. E dini se burgun e kam kry para një viti e gjysmë, zyrtarisht dhe ligjërisht është dashtë unë me kanë në liri”, ka deklaruar ai.
Ndryshe, Policia e Kosovës e ka shpallur person në kërkim Faton Hajrizin. Organet e rendit kanë kërkuar nga qytetarët që për çdo informatë që ndërlidhet me Hajrizin apo vendndodhjen e tij, të lajmërojnë Policinë e Kosovës.
“Policia e Kosovës-Drejtoria Rajonale e Policisë në Mitrovicën e Jugut, me autorizimin të prokurorit të Prokurorisë Themelore në Mitrovicë, është autorizuar të publikoj fotografinë e të arratisurit të poshtë shënuar me shpresë se në bashkëpunim me mediat dhe qytetarët do të bëhet e mundur lokalizimi dhe arrestimi i personit të shpallur në kërkim”, thuhej në komunikatën e Policisë.
11 °C
