Në spektaklin Prime të së premtes, publiku u surprizua me hyrjen e një banoreje të re në shtëpinë më të famshme në Kosovë, “Big Brother VIP Kosova”.

Bëhet fjalë për Jasmin Kadriun, e cila iu bashkua garës duke sjellë menjëherë interes dhe kureshtje të madhe tek banorët dhe teleshikuesit, për shkak të së kaluarës së saj televizive dhe historisë së njohur personale.

Jasmina nuk është një emër i panjohur për publikun shqiptar, pasi ajo ka qenë më herët pjesë e një prej formateve më të ndjekura të dashurisë, “Për’puthen”. Pikërisht aty ajo u bë e njohur për karakterin e saj, paraqitjet e drejtpërdrejta dhe për historinë sentimentale që krijoi gjatë kohës së qëndrimit në program.

Marrëdhënia e saj me Andi Artanin, i cili më vonë u bë edhe banor i sezonit të parë të “Big Brother VIP Kosova”, kishte marrë vëmendje të madhe mediatike dhe ishte komentuar gjerësisht në rrjetet sociale.

Historia e tyre e dashurisë, megjithatë, nuk pati një fund të lumtur. Pas përfundimit të eksperiencës në “Për’puthen”, lidhja mes Jasminës dhe Andit u shua, duke lënë pas shumë pikëpyetje dhe reagime nga publiku.

Vetë Andi kishte deklaruar se arsyeja e ndarjes lidhej me një tradhti që, sipas tij, kishte ndodhur gjatë marrëdhënies së tyre, një deklaratë që në atë kohë shkaktoi debate dhe ndasi mes ndjekësve të çiftit.

Hyrja e Jasmin Kadriut në “BBVK” pritet të sjellë dinamika të reja brenda shtëpisë, duke pasur parasysh të kaluarën e saj publike dhe lidhjen me një ish-banor të këtij formati.

Mbetet për t’u parë se si do të përshtatet ajo me lojën, çfarë marrëdhëniesh do të krijojë me banorët e tjerë dhe nëse e shkuara e saj do të ndikojë në rrugëtimin e saj brenda spektaklit./ORAinfo/

Komento:

	Komenti