Edhe deputetja e AAK-së Donika Kadaj-Bujupi ka folur rreth taksës ndaj produkteve serbe.

Ajo ka thënë ka thënë se taksa nuk do të ketë ndikim në marrëdhëniet në mes të Kosovës dhe SHBA-së.

“Nuk mund të prishen raportet e ndërtuara me dekada, sidomos jo për shkak të Serbisë. E dimë që Serbia në muajt e fundit ka ndërmarrë fushatë intensive duke shpenzuar miliona e miliarda të parave të saj të cilat janë përfituar nga tregu i Kosovës”.

“Çnjohjet dhe fushata agresive e Serbisë është përpjekje që ta zhbëjë shtetin e ri. Thirrjet për t’i lënë hapësirë dialogut duhet të drejtohen kah Serbia”, ka thënë Kadaj-Bujupi.

Sa i përket këmbënguljes së Kryeministrit Ramush Haradinaj që kjo tarifë të mos pezullohet me gjithë kërkesën e Amerikës, ajo ka thënë se kjo assesi nuk e bën atë antiamerikan.

“Ne më tepër po bëhemi zëdhënës të amerikanëve. Mund të konfirmoj se Haradinaj është lideri më proamerikan, jo vetëm në Kosovë, por edhe Ballkan dhe Europë. Të gjitha veprimet e tij nga viti 1999 e kanë konfirmuar këtë”, është shprehur Kadaj-Bujupi në Info Magazine.

“Parimisht, jemi për të respektuar të drejtën për tregtinë e lirë, e drejtë e cila respektohet. Kur bëhet fjalë për Serbinë, ajo duhet të reflektojë dhe të krijojë hapësirë për rajonin. Përderisa nuk reflekton dhe vazhdon me fushata të egra në raport me shtete fqinje nuk mund të presë diçka tjetër përveç reciprocitetit”.

Kadaj-Bujupi ka thënë se Kryeministri Haradinaj ka përkrahjen edhe të qytetarëve që të mos tërhiqet nga qëndrimi për taksën.

“S’bëhet fjalë për qëndrime populiste. Qëndrimi ynë është kundër çfarëdo lëshimi pe me Serbinë dhe sidomos në raport me kufijtë. Është obligim kushtetues që të mbrohet integriteti dhe sovraniteti i vendit”.

Komento:

	Komenti