Kadri Veseli do të paraqitet para gjyqit të Speciales të martën në ora 15:00.
Ish-kryetari i Partisë Demokratike të Kosovës, Kadri Veseli i cili dha dorëheqje nga aktiviteti politik menjëherë pas konfirmimit të aktakuzës nga Gjykata Speciale do të përballet për herë të parë me të të martën në ora 15:00.
Kështu thuhet në njoftimin zyrtar të Gjykatës Speciale ku thuhet se gjykatësi i procedurës paraprake siguron që të respektohen të drejtat e të akuzuarit në këtë paraqitje.
Ndër këto të drejta është ajo e përfaqësimit ligjor dhe që i akuzuari të kuptojë akuzat kundër tij.
“Gjithashtu, seanca mund të përcillet edhe nga galeria publike e sallës së gjyqit në ndërtesën e Dhomave të Specializuara të Kosovës në Hagë. Po ashtu, DHSK-ja ka edhe një qendër të posaçme për median në ndërtesën e vet në të cilën gazetarët mund të punojnë dhe të përcjellin seancat me një vonesë të shkurtër.”, thuhet në njoftimin i Speciales.